2020/21 මූල්‍ය වර්ෂයේ පළමු භාගය තුළ දී සිය සමාගමේ ලාභය පෙර මූල්‍ය වර්ෂයේ සමාලෝචිත කාලපරිච්ඡේදයට සාපේක්ෂව 32%කින් පහළ ගොස් ඇති බව ලයන් බෘෘවරි (සිලෝන්) පීඑල්සී සමාගම පවසයි. 2020 සැප්තැම්බර් 30 න් අවසන් කාර්තුව සඳහා නවතම මූල්‍ය වාර්තා නිකුත් කරමින් සමාගම වැඩිදුරටත් පවසන්නේ සාමාන්‍යයෙන් වැඩි ඉල්ලුමක් පවතින අප්‍රේල් උත්සව සමයේ දී කොවිඩ්-19 තත්ත්වය හේතුවෙන් පැවති ඇඳිරි නීති වාතාවරණය නිසා තම සමාගමේ කාර්යසාධනයට දැඩි බලපෑමක් එල්ල වූ බවයි. මේ අනුව 2020/21 පළමු භාගයේ දී ආදායමේ 11% ක පහළ යාමක් සිදුව තිබේ.
කෙසේ වෙතත් ලයන් බෘෘවරි සමාගමේ දේශීය වෙළෙඳපොළ කොටසට එසේ බලපෑම් එල්ල වුවද, මෙම කාලය තුළ සිය අපනයනවල කැපී පෙනෙන වර්ධනයක් සිදුව ඇති බව සමාගම වැඩිදුරටත් සඳහන් කරයි. වර්තමානයේ දී ලයන් බියර් සිය නිෂ්පාදිත රටවල් 25කට අපනයනය කරනු ලබයි. එහිදී පළමු භාගය තුළ දී අපනයනය කරන ලද බියර් පරිමාව 19% කින් හා එම කොටස හරහා ඉපයූ ලාභය 32% කින් වැඩි වී තිබේ. ලයන් බියර් අපනයන සඳහා සැලකිය යුතු පරිමාණයේ වෙළෙඳපොළක් වන මාලදිවයිනේ සංචාරක කර්මාන්තයේ යම් මන්දගාමීත්වයක් පෙන්නුම් කළ පසුබිමක් හමුවේ වුවද අපනයන අංශය මෙලෙස සාර්ථක කාර්යසාධනයක් වාර්තා කර තිබීම සුවිශේෂී වේ. පළමු භාගය තුළ දී විදේශීය අංශයේ නව වෙළෙඳපොළ වර්ධනයක් සිදු නොවූ හෙයින් පැවති වෙළෙඳපොළ හරහා මෙලෙස ඉහළ වර්ධනයක් අත්පත් කර ගෙන ඇත.
2020/21 මූල්‍ය වර්ෂයේ පළමු භාගයේ දී සමාගමේ ලාභය 32%කින් පහළ ගියද 2020.09.30 න් අවසන් කාර්තුව තුළ දී සමාගමේ බදු ගෙවීමෙන් පසු ලාභය 18% කින් ඉහළ ගොස් රුපියල් බිලියන 1 ක් ලෙසින් සටහන්ව තිබේ. එසේම මෙම කාර්තුව තුළ දී සමාගමේ ආදායම රු. බිලියන 12.31 සිට රු. බිලියන 15.07 ක් දක්වා 22%කින් වර්ධනය වී ඇත.
(මූලාශ්‍රය- අද දෙරණ බිස්නස්)
