උසස් පෙළ සමයේ විදුලි කප්පාදුව සම්බන්ධයෙන් සාකච්ඡා කිරීම සඳහා මානව හිමිකම් කොමිසම කැඳවා තිබූ සාකච්ඡාවට සහභාගී නොහැකිවීම සම්බන්ධව කරුණු දක්වමින් ඛනිජ තෙල් නීතිගත සංස්ථාවේ කළමනාකරණ අධ්‍යක්ෂකවරයා මානව හිමිකම් කොමිෂන් සභාව වෙත ලිපියක් යොමු කර තිබෙනවා.
ඔවුන් එමඟින් පෙන්වා දී ඇත්තේ පසුගිය 25 වනදා පැවැති එම සාකච්ඡාවට සහභාගී වීමට නොහැකි වුණේ නිවාස සංවර්ධන මුල්‍ය සංස්ථා බැංකු අධ්‍යක්ෂක මණ්ඩල රැස්වීමට එදින සහභාගී වීම හේතුවෙන් බවයි.
කෙසේ වෙතත් තමන් නියෝජන කරමින් සහභාගී වූ ඛනිජ තෙල් නීතිගත සංස්ථා නිලධාරීන් අදාළ සාකච්ඡාවේ දී මතුකළ කරුණු සම්බන්ධව නිසි අවධානයක් යොමු නොවූ බවද කළමනාකරණ අධ්‍යක්ෂකවරයා එහිදී දක්වා තිබෙනවා.
හුදෙක් මානව හිමිකම් කොමිෂන් සභාවේ ඒක පාර්ශවිය මතය වෙත ඛනිජ තෙල් සංස්ථා නිලධාරීන්ගේ අනුමැතිය ලබාගත් බවට අදාළ නිලධාරීන් තමන්ට වාර්තා කළ බවයි ඔහු එම ලිපිය තුළින් සඳහන් කර ඇති බවයි වාර්තා වන්නේ.
ඒ මහතා පෙන්වා දෙන්නේ ඒ හේතුවෙන් ලංකා ඛනිජ තෙල් නීතිගත සංස්ථාව වෙත අසාධාරණයක් සිදුව ඇති බැවින් මානව හිමිකම් කොමිෂන් සභාවේ නිර්දේශය යළි සලකා බැලීමේ දී දැඩි අවශ්‍යතාවක් පවතින බවයි.
විදුලිබල මණ්ඩලයට අඛණ්ඩව දැවි තෙල් සහ නැප්තා ආනයනික ඉන්ධනවලට වදාඅ අඩු පිරිවැයක් යටතේ නිකුත් කළ හැකි වුවත් ඊට මුදල් නොලැබීම සහ ණය පදනම මත දැනට පවතින තොග නිකුත් කිරීමෙන් ඉදිරි කාලය තුලදී යළිත් වතාවක් අකර්මණ්‍ය වීමේ අවධානමක් මතු විය හැකි බව ඔහු අදාළ ලිපියෙන් සඳහන් කර තිබෙනවා.
විදුලි සැපයීම ජාතික අවශ්‍යතාවක් සේ සලකා රුපියල් බිලියන 111ක වටිනාකමින් යුත් ඉන්ධන ලංකා විදුලිබල මණ්ඩලයට අද (27) වන විට ලබාදී ඇති බව ලංකා ඛනිජ තෙල් නීතිගත සංස්ථාව එම ලිපියෙන් වැඩිදුරටත් පෙන්වා දී ඇති බවයි වාර්තා වන්නේ.
