ත්රිරෝද රථයකින් පැමිණි පුද්ගලයින් දෙදෙනෙකු විසින් සුනඛයෙකු හට පොල්ලකින් පහර දෙන අයුරු දැක්වෙන වීඩියෝවක් සමාජ මාධ්ය තුල සංසරණය වුණා.
ඒ සම්බන්ධව සුනඛයාගේ හිමිකාරිය විසින් ඊයේ (18) අක්මීමණ පොලිස් ස්ථානය වෙත පැමිණිල්ලක් ඉදිරිපත් කරමින් 2024.12.11 වන දින ත්රීරෝද රථයකින් පැමිණි පුද්ගලයින් දෙදෙනෙකු විසින් තම සුනඛයාට පහර දුන් බවත් ඒ හේතුවෙන් සුනඛයා මියගොස් ඇති බවට පවසා තිබෙනවා.
ඒ අනුව විමර්ශන ආරම්භ කළ අක්මීමණ පොලිස් ස්ථානයේ නිලධාරීන් විසින් වීඩියෝවෙහි සිටි සුනඛයාට පහරදුන් සැකකරුවන් දෙදෙනා ත්රීරෝද රථය ද සමග ඊයේ අත්අඩංගුවට ගැනීමට සමත්ව වු බවට වාර්තා වනවා.
සැකකරුවන් වයස අවුරුදු 34 ක් සහ 37ක් වූ බටදූව ප්රදේශයේ පදිංචිකරුවන්.
මෙය 1907 අංක 13 දරන සත්ත්ව හිංසාව වැළැක්වීමේ ආඥා පනතේ දෙවැනි වගන්තිය යටතේ යම් තැනැත්තකු යම් සතකුට කෘෘර ලෙස පහරදීම, හිංසා කිරීම, නොසලකා හැරීම, වාහනයක, කූඩයක රැගෙන යෑම, වේදනාවට පත්කිරීම ආදී ක්රියා මඟින් සත්ත්ව හිංසනය කිරීම යටතේ ගැනෙන වරදකි.
ඒ අනුව මෙම සැකකරුවන් අද(19) ගාල්ල මහෙස්ත්රාත් අධිකරණය වෙත ඉදිරිපත් කිරිමට නියමිතයි.
