දැනට පවත්නා සංචරණ සීමාවන් තවදුරටත් ලිහිල් කරමින් නව සෞඛ්‍ය මාර්ගෝපදේශ නිකුත් කර තිබෙනවා.
ඒ අනුව අද සිට පන්සල්, පල්ලි, කෝවිල් ඇතුළු පූජනීය ස්ථාන විවෘතව තැබීමට අවසර හිමිවනවා.
එමෙන්ම උපරිමය පුද්ගලයින් 150 කට යටත්ව විවාහ මංගල උත්සව පැවැත්වීමටද නව සෞඛ්‍ය මාර්ගෝපදේශ මගින් අවසර ලබාදී තිබෙනවා.
එළිමහන් වෙළදාම හා සතිපොල සඳහාද අවසර ලබාදී ඇති අතර වැඩමුළු, සම්මන්ත්‍රණ යනාදියද පුද්ගලයින් 50 කගේ සහභාගීත්වයෙන් පැවැත්විය හැකියි.
සියලුම විභාග පැවැත්වීමට අවසර හිමිව ඇති අතර ආර්ථික මධ්‍යස්ථානද විවෘත කිරීමට අවසර ලබාදී තිබෙනවා.
සාප්පු සංකීර්ණද විවෘත කිරීමට නව සෞඛ්‍ය මාර්ගෝපදේශ මගින් අවසර ලබාදී ඇති අතර බාබර් සාප්පු ඇතුළු රූපලාවාන්‍යගාරද විවෘතව තැබෙනු ඇති.
නිමි ඇඳුම් වෙළෙඳසැල් යළිත් වරක් විවෘත කිරීමට අවසර ලබාදී ඇතත් ඒවා සෞඛ්‍ය මාර්ගෝපදේශවලට යටත්කර තිබෙනවා.
තවදුරටත් බන්ධනාගාර සඳහා අමුත්තන් පැමිණීම තහනම් කර ඇති අතර වැඩිහිටි හා ළමා නිවාසවලටද අමුත්තන් පැමිණීම තහනම් කර තිබෙනවා.
සිනමා ශාලාද ආසන ධාරිතාවයෙන් 50% ක සීමාවකට යටත්ව විවෘත කිරීමට අවසර ලබාදී ඇති අතර ස්පා, හෝටල් හා විවේකාගාරද විවෘත කිරීමට අවසර ලැබෙනවා.
කෙසේ වෙතත් තවදුරටත් කැසිනෝ, රාත්‍රී සමාජ ශාලා හා ඔට්ටු මධ්‍යස්ථාන වසා තැබෙනු ඇති.
