කොළඹ සහ ඒ අවට තදාසන්න ප්‍රදේශවල විවිධ රැකියාවන්හි නිරතව සිටි විශාල පිරිසක් මෙවර පළාත් පාලන මැතිවරණයේදී ඡන්දය ප්‍රකාශ කිරීමට සිය ගම්බිම් වෙත ගොස් නැති බව දිස්ත්‍රික් ලේකම් කාර්යාල ආරංචි මාර්ග පවසා තිබෙනවා.
මැතිවරණ නිරීක්ෂකයන් පවසන්නේ, මෙය රටේ ප්‍රධාන තීරණාත්මක ඡන්දයක් නොවීම, දේශපාලනය සහ මැතිවරණ ක්‍රමය ගැන ඇති සෘණාත්මක හැඟීම් සහ විවිධ කලකිරීම්, ගම්බිම් බලා යෑමට ප්‍රවාහන වියදම් දැරීමට නොහැකි වීම මැතිවරණය සම්බන්ධයෙන් දේශපාලනික වශයෙන් ලොකු පිබිදීමක් හට නොනැගීම ආදි විවිධ හේතු කාරණා මේ සඳහා බලපා තිබූ බවයි.
එමෙන්ම ළඟ ළඟ ප්‍රධාන මැතිවරණ කිහිපයක් පැවැත්වීමෙන්ද එය බලපා ඇති බව මැතිවරණ නිරීක්ෂකයින් පෙන්වාදෙනවා.
මැතිවරණ ප්‍රචාරක ද්‍රව්‍ය ප්‍රදර්ශනය නොකිරීම හේතුවෙන් මැතිවරණ උණුසුමක් ඇති නොවීමද ඡන්දය පිළිබඳ උද්යෝගය අඩුවීමට ප්‍රධාන වශයෙන් හේතු වුණු බව නිරීක්ෂණ සංවිධාන පවසනවා.
