රිය අනතුරුවලින් පුද්ගලයින් 2,243 දෙනෙකු මියගොස් ඇතැයි, පොලීසිය පවසනවා.
ඒ, මෙම වසරේ ජනවාරී පළමු වැනිදා සිට දෙසැම්බර් 13 වැනිදා දක්වායි.
එම කාලසීමාව තුළ වාර්තා වී ඇති රිය අනතුරු සංඛ්‍යාව, 22 967 ක් වන අතර ඒ අතරින් සිදුව ඇති මාරක අනතුරු ගණන 2,141ක්.
එය සමස්ත රිය අනතුරුවලින් 9%ක ප්‍රතිශතයක්.
පොලීසිය සඳහන් කළේ, බරපතල ගණයේ අනතුරු 6,500 ක් ද වාර්තාවී ඇති බවයි.
එම කාලසීමාව තුළ වාර්තා වී ඇති සුළු අනතුරු සංඛ්‍යාව, 9127 ක්.
මේ අතර ඊයේ (21) සිදුවූ රිය අනතුරුවලින් පුද්ගලයින් 5 දෙනෙකු මියගොස් 56 දෙනෙකු තුවාල ලැබුවා.
ඉන් පුද්ගලයින් තුන්දෙනෙකු මියගියේ, හැටන් මල්ලියප්පුව ප්‍රදේශයේදී බස් රථයක් ප්‍රපාතයකට පෙරළීමෙන්.
ඉන් තුවාල ලැබූ සංඛ්‍යාව, 46 ක්.
දක්ෂිණ අධිවේගී මාර්ගයේ බද්දේගම සහ පින්නදූව පිවිසුම් අතර සිදුවූ අනතුරකින් පුද්ගලයින් දෙදෙනෙකු මියගියා.
වෑන් රථයක්, ලොරියක ගැටීමෙන් සිදුවූ අනතුරින් පුද්ගලයින් 6 දෙනෙකු තුවාල ලැබුවා.
තවත් පුද්ගලයින් 10 දෙනෙකු තුවාල ලැබුවේ, කඩුගන්නාවේදී බස් රථයක් ගසක ගැටීමෙන්.
උත්සව සමයේ අනතුරු අවම කරගැනීමට අවශ්‍ය පියවර ගන්නැයි පොලීසිය ජනතාවට දැනුම් දෙනවා.
