විශ්රාම වැටුප් ලබන හිටපු පාර්ලිමේන්තු මන්ත්රීවරුන්ගේ ගණන 266ක් දක්වා ඉහළ ගොස් තිබෙනවා.
පාර්ලිමේන්තුවේ නවතම වර්තාවක දැක්වෙන්නේ ඉන් මන්ත්රීවරුන් 120 දෙනෙක් පමණ මියගොස් ඇති බැවින් ඔවුන්ගේ විශ්රාම වැටුප් බිරින්දෑවරුන් ලබා ගන්නා බවයි.
විශ්රාමික මන්ත්රීවරුන්ගේ විශ්රාම වැටුප් ගෙවීම සඳහා පමණක් වාර්ෂික වැය කරන මුදල රුපියල් කෝටි 15කට ආසන්න මුදලක් වැය වෙන බව වාර්තා වනවා.
හිටපු කාන්තා මන්ත්රීවරියන් 15 දෙනෙක් විශ්රාම වැටුප් ලබා ගන්නා බවද සඳහන් වනවා.
මේ අතර ජනතා විමුක්ති පෙරමුණේ හිටපු මන්ත්රීවරුන් විසි තුන්දෙනෙක් විශ්රාම වැටුප ලබා ගනිමින් සිටින අතර එම වාර්තාවේ පාර්ලිමේන්තු මන්ත්රීවරුන් ලෙස කටයුතු කළ ස්වාමින් වහන්සේලා පස් දෙනෙක් විශ්රාම වැටුප් ලබා ගනිමින් සිටිනවා.
එම ස්වාමීන් වහන්සේලා වන්නේ එල්ලාවල මේධානන්ද, උඩුවේ ධම්මාලෝක, කොටපොල අමරකීර්ති,අක්මීමන දයාරත්න, අපරැක්කේ පුඤ්ඤානන්දයි.
මාලනී ෆොන්සේකා, ජීවන් කුමාරතුංග, උපේක්ෂා ස්වර්ණමාලි සහ රන්ජන් රාමනායක යන කලාකරුවන් සිව් දෙනෙක් ද විශ්රාම වැටුප් ලබමින් සිටිනවා.
තවද හිටපු ක්රිකට් ක්රීඩකයන් දෙදෙනෙක්ට ද විශ්රාම වැටුප් ලැබෙන අතර අර්ජුන රණතුංග සහ සනත් ජයසූරිය එම දෙදෙනා වෙනවා.
ඊට අමතරව දේශපාලන, ආගමික සහ කලා ඇතුළු විවිධ ක්ෂේත්රයන්හි විද්වතකු මෙන්ම සන්නිවේදකයකු වන ජේ.ආර්.පී සූරියප්පෙරුම මහතා ද හිටපු පාර්ලිමේන්තු මන්ත්රීවරයකු ලෙස කටයුතු කළ අතර ඔහුටද විශ්රාම වැටුපක් ලැබෙන බවයි වාර්තා වන්නේ.
සාමාන්යයෙන් පාර්ලිමේන්තු මන්ත්රීවරයකුගේ වැටුපෙන් (රුපියල් 54000) තුනෙන් එකකට එනම් රුපියල් 18095ක මුදලට, තවත් රුපියල් 25000ක දීමනාවක් එක්වීමෙන් මන්ත්රී විශ්රාම වැටුප සැකසෙයි. ඒ අනුව පාර්ලිමේන්තු මන්ත්රීවරයකුට ලැබෙන විශ්රාම වැටුප රුපියල් 43095කි.