මහවැලි ඇතුළු ගංගා කිහිපයක පහළ ජලාධාර ප්‍රදේශවල තවදුරටත් ගංවතුර තත්ත්වයක් පවතින බව, වාරිමාර්ග දෙපාර්තමේන්තුව පවසනවා.
එහි ජල විද්‍යා හා ආපදා කළමනාකරණ අධ්‍යක්ෂ එස්.පී . සී සූගීෂ්වර මහතා සඳහන් කළේ, මහවැලි ගඟේ මනම්පිටියට පහළ ප්‍රදේශයේ තවදුරටත් ගංවතුර තත්ත්වයක් පවතින බවයි.
යාන් ඔය, යාන්ඔය ජලාශයට පහළ ප්‍රදේශයෙන් ද, දැදුරුඔය හලාවත ප්‍රදේශයෙන් ද , තවදුරටත් ගංවතුර මට්ටමේ පවතිනවා.
කෙසේ වෙතත්, එම ප්‍රදේශවල ගංවතුර සෙමෙන් බැස යමින් ඇතැයි, වාරිමාර්ග දෙපාර්තමේන්තුව පැවසුවා.
මේ අතර, මහා පරිමාණ ජලාශ 37 ක් හා මධ්‍යම පරිමාණ ජලාශ 90 ක් තවදුරටත් වාන්දමමින් පවතිනවා.
අධික වැසි සමග ඇතිවූ ආපදාවලින් මිය ගිය සංඛ්‍යාව 16 ක් දක්වා ඉහළ ගොස් තිබෙනවා.
ආපදා කළමණාකරණ මධ්‍යස්ථානය පැවසුවේ මේ වන විට 19 දෙනෙකු තුවාල ලබා ඇති බවයි.
අධික වැසි සහිත කාලගුණයෙන් පුද්ගලයින් 465,746 තවදුරටත් බලපෑම් එල්ලවී තිබෙනවා.
සුරක්ෂිත මධ්‍යස්ථාන 245 ක පුද්ගලයින් 29,596 දෙනෙකු තවදුරටත් රඳවා තබා ගෙන ඇතැයි, ආපදා කළමනාකරණ මධ්‍යස්ථානය නිකුත් කළ නවතම වාර්තාවේ දැක්වෙනවා.
නිවාස 98කට පූර්ණ හානි සිදුව ඇති අතර අර්ධ හානි සිදුව ඇති නිවාස සංඛ්‍යාව 2,333 ක්.
