පාකිස්ථානයේ ඇති වූ ගංවතුර නිසා ජාතික හදිසි තත්වයක් ප්රකාශයට පත් කර මාස හතරකට වැඩි කාලයක් ගතවී ඇතත්, මිලියන හතරකට ආසන්න ළමුන් පිරිසක් තවමත් පාකිස්තානයේ දූෂිත හා එකතැන පල්වෙන ගංවතුර අසල ජීවත් වන බව යුනිසෙෆ් සංවිධානය අනාවරණය කරයි.
එමගින් ඔවුන්ගේ සෞඛ්ය තත්වය බරපතල ලෙස අවදානමට ලක් කර ඇති බවයි ඩෝන් යුනිසෙෆ් පෙන්වාදෙයි.
ගංවතුරින් පිඩාවට පත්වූ ප්රදේශවල රාත්රියේදී උෂ්ණත්වය සෙල්සියස් අංශක හතක් දක්වා පහත වැටෙන අතර, ජාකොබාබාද් වැනි ස්ථානවල බොහෝ පවුල්වලට පල්වෙන ගංවතුර ජලය අසල රෙදිකඩකින් පමණක් තම තාවකාලික නවාතැන් ආවරණය කරගනිමින් වාසය කරන බව පැවැසේ.
යුනිසෙෆ් සහ එහි හවුල්කාර සංවිධාන කඳුකර ප්රදේශවල වෙසෙන ළමුන්, කාන්තාවන් සහ පිරිමින් ඇතුළු 200,000ක් ජනතාවට සෞඛ්ය පහසුකම් සහ අත්යවශ්ය භාණ්ඩ සැපයීම ආරම්භ කර ඇති බව වාර්තා සඳහන් කරයි.
යුනිසෙෆ් සංවිධානය වැඩිදුරටත් පෙන්වාදෙන්නේ අපිරිසිදු ජලය හේතුවෙන් ළමුන් අතර උග්ර ශ්වසන ආසාදන දක්නට ලැබෙන බවයි.
එසේම, පාකිස්තානයේ ගංවතුරෙන් පීඩාවට පත් ප්රදේශවල දැඩි උග්ර මන්දපෝෂණයෙන් පෙළෙන ළමුන් සංඛ්යාව 2021 ට සාපේක්ෂව ජූලි සිට දෙසැම්බර් දක්වා දෙගුණයකට ආසන්න වන බව ඇස්තමේන්තු කර තිබේ.