ජාතික කෞතුකාගාරය ගොඩනැගිලි පිහිටි භූමියේ තණ පිඩැලි ඇල්ලීමට රුපියල් මිලියන 40ක් ( කෝටි 04 ) වැය කිරීමට ජාතික කෞතුකාගාර දෙපාර්තමේන්තුව පියවර ගෙන තිබේ.
එම දෙපාර්තමේන්තුව පවසන්නේ කෞතුකාගාර ගොඩනැගිල්ල පිහිටි භූමියේ දැනට අල්ලා ඇති තණ කොළ ඉඩෝරය පවතින කාලවලදී වියළීයාම මෙම නව තණ පිඩැලි ඇල්ලීමට හේතු වී ඇති බවයි.
ඒ අනුව රජය මගින් ලබාදෙන මහජන මුදල් යොදාගනිමින් අක්කර හතක ප්‍රදේශයක් තුළ තණ පිඩැලි ඇල්ලීම සිදුකරන අතර ඒ සඳහා අවශ්‍ය සැලසුම් හා උපදෙස් නාගරික සංවර්ධන අධිකාරිය විසින් ලබා දී තිබේ.
අදියර දෙකක් යටතේ සිදුකරන මෙම කටයුත්තේ පළමු අදියර එළැඹෙන ජනවාරි මාසය වන විට අවසන් කර දෙවැනි අදියර ආරම්භ කිරීමට සුදානම් බව එම දෙපාර්තමේන්තුව පවසයි.
ජාතික කෞතුකාගාර දෙපාර්තමේන්තුවේ අධ්‍යක්ෂ ( සංස්කෘතික ) සෙනරත් වික්‍රමසිංහ මහතා පවසන්නේ තණ පිඩැලි ඇල්ලීමෙන් පසු එම භූමිය උද්භිත උද්‍යානයක් ලෙස අලංකාර කර දෙස් විදෙස් සංචාරකයින්ගේ ආකර්ෂණය දිනාගන්නා ස්ථානයක් බවට පත්කරන බවයි.
