ඇෆ්ගනිස්ථානයේ ජනතාව මුහුණ දෙමින් සිටින පෙර නොවූ විරූ මානුෂික අර්බුදය පිළිබද යළි ලෝකයට කුණු අවධාරණය කරමින් රටේ මිලියන නවයක ජනතාවක් සාගතයේ අවදානමට ලක්ව සිටින බවට එක්සත් ජාතීන්ගේ මහලේකම් අන්තෝනියෝ ගුටරෙස් අනතුරු අඟවා තිබේ.
ඇෆ්ගනිස්ථානයේ ආර්ථිකය අවදානම් සහගත ලෙස කඩා වැටී ඇති බවත් එක්සත් ජාතීන්ගේ සහ එහි හවුල්කරුවන්ට ජීවිතාරක්ෂක ආධාර අඛණ්ඩව සැපයීමට හැකිවන පරිදි රට වෙනුවෙන් අරමුදල් සම්පාදනය කරන ලෙස තමන් ඉල්ලා සිටින බවත් ගුටරෙස් ට්විටර් ඔස්සේ පරිත්‍යාගශීලීන්ගෙන් ඉල්ලා සිටියේය.
“පසුගිය මාස කිහිපය තුළ ඇෆ්ගනිස්ථානයේ මානුෂික තත්ත්වය භයානක ලෙස පිරිහී ඇත.මිලියන 9 ක ජනතාවක් සාගතයේ අවදානමට ලක්ව ඇත. අපගේ ආයචනය වෙනුවෙන් කඩිනමින් අරමුදල් සපයන ලෙස මම පරිත්‍යාගශීලීන්ගෙන් ඉල්ලා සිටිමි. එවිට එක්සත් ජාතීන්ගේ හවුල්කරුවන්ට අඛණ්ඩව ආධාර සැපයිය හැකියි” යනුවෙන් එම ට්විටර් පණිවුඩයෙහි සඳහන් විය.
මේ අතර පසුගිය වසරේ අගෝස්තු මාසයේ ඇෆ්ගනිස්ථාන රජය බිඳ වැටී තලේබාන් සංවිධානය බලයට පත්වීමත් සමඟ හටගත් බරපතල මානව හිමිකම් කඩවීම් නොනැවතී සිදු වෙමින් පවතින බව වාර්තා වේ.
එපමණක් නොව පෙර නොවූ විරූ මානුෂික අර්බුදයකට ඇෆ්ගනිස්ථානයේ ජනතාව මුහුණ දෙමින් සිටින බව වාර්තා පෙන්වා දෙයි.
විශේෂයෙන් එක්සත් ජනපදය ආධාර අරමුදල්වලින් සහ ගෝලීය මුල්‍ය පද්ධතියට ප්‍රවේශ වීම ඇෆ්ගනිස්ථානයට අවහිර කර තිබීම ද එම තත්ත්වයට හේතු වී ඇතැයි සඳහන් වේ.
