රජයේ කාර්යාල සදහා සේවයට වාර්තා කිරීමේදී පහසු ඇදුමකින් සේවයට වාර්තා කිරීමට ඉඩ ලබාදෙමින් සිය අමාත්‍යාංශය නිකුත් කළ චක්‍රලේඛය පාසල් ගුරුවරුන්ට අදාළ නොවන බව රාජ්‍ය පරිපාලන හා ස්වදේශ කටයුතු, පළාත් සභා හා පළාත් පාලන අමාත්‍යාංශය පවසනවා.
එම අමාත්‍යාංශයේ ලේකම් ප්‍රියන්ත මායාදුන්නේ පැවසුවේ එම චක්‍රලේඛය වෙනත් සේවාවන් වල නිරත පිරිස්වලට අදාළ කරගත නොහැකි බවයි.
රාජ්‍ය පරිපාලන අමාත්‍යාංශය නිකුත් කළ චක්‍රලේඛය අනුව පහසු ඇදුමකින් සැරසී සේවයට වාර්තා කිරීමට ගුරුවරුන්ටද හැකි බවට ඇතැම් පාර්ශ්ව පළ කරන අදහස් සම්බන්ධයෙන් ප්‍රතිචාර දක්වමින් ඔහු මේ බව කියා සිටියා.
මේ අතර, පාසල් දරුවන් ඉලක්ක කර මත් පෙති විකුණූ උපකාරක පන්ති ගුරුවරයෙකු කළුතරදී අත්අඩංගුවට ගෙන තිබෙනවා.
ඒ, පොලිස් විශේෂ කාර්ය බලකායේ කටුකුරුන්ද පුහුණු පාසලේ නිලධාරීන්ට ලද තොරතුරක් මත සිදුකළ වැටලීමකදීයි.
එහිදී අත්අඩංගුවට ගැනුණු සැකකරු සතුව තිබී මත්පෙති 1,299ක් සොයා ගෙන ඇති බවයි වාර්තා වන්නේ.
එලෙස අත්අඩංගුවට ගෙන ඇත්තේ ගණිතය සහ විද්‍යාව උපකාරක පන්ති පවත්වන පුද්ගලයෙක්. කළුතර ප්‍රදේශයේ නිවසක කුලී පදනම මත රැඳීසිට ඇති එම සැකකරු මාවනැල්ල ප්‍රදේශයේ ස්ථිර පදිංචිකරුවෙකු බව පොලීසිය පවසනවා.
