නවක ගායන ශිල්පිනී යොහානි දිලෝකා ද සිල්වා මෙනෙවියට උපහාර පිදීමේ උත්සවයක් පාර්ලිමේන්තු මන්ත්‍රීවරියන්ගේ සංසදය විසින් සූදානම් කර තිබෙනවා.
ඒ අනුව එළැඹෙන 23 වනදා පාර්ලිමේන්තු සංකීර්ණයේදී මෙම උත්සවය සංවිධානය කර ඇතැයි පාර්ලිමේන්තුවේ නියෝජ්‍ය මහලේකම් සහ කාර්ය මණ්ඩල ප්‍රධානී කුෂාණී රෝහණදීර මහත්මිය පවසනවා.
එම අවස්ථාවට කතානායක මහින්ද යාපා අබේවර්ධන, අග්‍රාමාත්‍ය මහින්ද රාජපක්ෂ යන මහත්වරුන් ද සහභාගීවීමට නියමිතයි.
එදින පෙරවරුවේ පාර්ලිමේන්තු මන්ත්‍රීවරියන්ගේ සංසදයේ සාමාජිකාවන් යොහානි ද සිල්වා මෙනෙවිය පාර්ලිමේන්තුවේ ගැලරියට කැඳවා ගෙන එනු ලබන අතර ඉන් අනතුරුව කතානායකවරයා පාර්ලිමේන්තු සභාව අමතමින් ඇයගේ පැමිණීම සියලු මන්ත්‍රීවරුන්ට දැනුම්දෙනු ඇති.
ඉන් අනතුරුව ඇය පාර්ලිමේන්තු පරිශ්‍රයේ පැවැත්වෙන උත්සව සභාව වෙත කැඳවා ගෙන යනු ලබන අතර එහිදී ඇයට විශේෂ උපහාර පිදීමක් සිදු කිරීමට නියමිතයි.
