කතානායක වෛද්‍ය ජගත් වික්‍රමරත්න මහතා රාජ්‍ය දේපළ අවභාවිත කරන බව පවසමින් නව ජනතා පෙරමුණ අල්ලස් හෝ දූෂණ චෝදනා විමර්ශන කොමිෂන් සභාවට ඊයේ (04) පැමිණිල්ලක් ඉදිරිපත් කර තිබෙනවා.
මේ සම්බන්ධයෙන් අදහස් දක්වන එම පක්ෂයේ නායක සුගීස්වර බණ්ඩාර මහතා පවසන්නේ කතානායකවරයා පහළොස් දෙනෙකුගෙන් යුතු කාර්ය මණ්ඩලයක් සිය කටයුතු සඳහා යොදාගෙන ඇති බවයි.
එසේම කතානායකවරයා සිය නිල වාහන දෙකට අමතරව තවත් වාහනයක් ලබාගෙන ඇති බවත් එම වාහනය ඔහුගේ පෞද්ගලික ලේකම්වරයා වෙනුවෙන් වෙන්කර ඇති බවත් ඔහු සඳහන් කළා.
කතානායකවරයා සිය නිල රථ සඳහා පාර්ලිමේන්තු මහ ලේකම්වරියගේ අවසරය ඇතිව ඉන්ධන ලීටර් 900ක් ලබා ගන්නා බව පැවසූ බණ්ඩාර මහතා කථානායක වෙනුවෙන් නිල නිවසක් තිබියදී කොළඹ ලොරිස් මහල් නිවාස සංකීර්ණයෙන් තවත් නිල නිවසක් ලබාගෙන ඇති බව ප්‍රකාශ කර සිටියා.
එම නිල නිවසේ පදිංචිව සිටින්නේද ඔහුගේ පෞද්ගලික ලේකම්වරයා බව ඔහු පවසනවා.
කතානායකවරයා කතානායක නිල නිවස පාවිච්චි නොකරන බවට ප්‍රකාශ කළද එය විශේෂ උත්සව අවස්ථා සඳහා පාවිච්චි කරන බවට තොරතුරු දැනගන්ට ලැබී ඇතැයිද ඔහු කියාසිටියා.
මේ සම්බන්ධයෙන් අදහස් දක්වන කතානායක මාධ්‍ය අංශය පවසන්නේ එම සියලු චෝදනා ප්‍රතික්ෂේප කරන බවයි.
මෙම චෝදනා සම්බන්ධයෙන් ඉදිරියේදී පූර්ණ කරුණු පැහැදිලි කිරීමක් කිරීමට බලාපොරොත්තු වන බවද එම අංශය වැඩිදුරටත් සඳහන් කරනවා.
