හිටපු රහස් පොලිස් ප්රධානී ශානි අබේසේකර මහතා රිය අනතුරකට ලක් කර මරා දැමීමේ කුමන්ත්රණයක් හෙළි වී ඇතැයි නීතිපතිවරයා අද (04) අභියාචනාධිකරණයට දැනුම්දී තිබෙනවා.
නීතිපති වෙනුවෙන් පෙනී සිටි අතිරේක සොලිසිටර් ජනරාල් ජනාධිපති නීතිඥ රොහාන්ත අබේසූරිය මහතා මේ බව දැනුම් දුන්නේ හිටපු රහස් පොලිස් ප්රධානී ශානි අබේසේකර මහතා තම ආරක්ෂාව තර කරන ලෙස ඉල්ලා ගොනු කර තිබූ රිට් පෙත්සමක් සළකා බැලු අවස්ථාවේදී.
මෙම රිට් පෙත්සම නිශ්ශංක බන්දුල කරුණාරත්න සහ විකුම් කළුආරච්චි මහත්වරුන්ගෙන් සමන්විත අභියාචනාධිකරණ විනිසුරු මඩුල්ලක් හමුවේ සළකා බලා තිබෙනවා.
මෙම පෙත්සම සළකා බැලු අවස්ථාවේදී නීතිපති වෙනුවෙන් පෙනී සිටි අතිරේක සොලිසිටර් ජනරාල් ජනාධිපති නීතිඥ රොහාන්ත අබේසූරිය මහතා කියා සිටියේ බුද්ධි අංශ වාර්තාවෙන් ශානි අබේසේකර මරා දැමීමේ කුමන්ත්රණයක් හෙළි වී ඇති බවත් නීතිපතිවරයා ශානි අබේසේකර මහතා ආරක්ෂාව වැඩි කිරීමට එකඟ වී ඇති බවයි.
ශානි අබේසේකර මහතාගේ ආරක්ෂාවට ප්රමාණවත් පොලිස් භටයන් සපයා නොමැති බවත් පොලිස් නිලධාරීන් තිදෙනෙක් සහ යතුරු පැදියක් පමණක් ලබා දී ඇති බව හිටපු රහස් පොලිස් ප්රධානී ශානි අබේසේකර මහතා වෙනුවෙන් පෙනිසිටි ජනාධිපති නීතිඥ උපුල් ජයසූරිය මහතා කියා සිටියා.
තව ද පෙත්සම්කරුට ප්රමාණවත් ආරක්ෂාවක් ලබා දෙන ලෙස වින්දිතයින් හා සාක්ෂිකරුවන් ආරක්ෂා කිරීමේ අධිකාරිය පොලිස්පතිවරයා වෙත නියෝගයක් නිකුත් කර තිබුණ ත් එය මේ දක්වා ඉටුවී නොමැති බවට ද ඔහු චෝදනා කළා.
මේ පිළිබඳ සුදුසු පියවර ගැනීමට පෙත්සම දෙසැම්බර් 14 වැනිදා කැඳවන ලෙස නියෝග කළා.
