කිරි පිටි, ගෘහස්ථ ගෑස්, තිරිඟු පිටි හෝ සිමෙන්තිවල මිල ගණන් ඉහළ දැමීම සම්බන්ධයෙන් තීරණයක් ඊයේ (27) පැවති කැබිනට් මණ්ඩල රැස්වීමේදී ගෙන නොමැති බව වාර්තා වෙයි.
කෙසේ වෙතත් කොළඹ වරායේ සිරවී ඇති ආනයනය කළ අත්‍යවශ්‍ය ආහාර ද්‍රව්‍ය මුදාහැරීම සඳහා මහ බැංකුවෙන් අවශ්‍ය මුදල් ලබාදීමට කැබිනට් මණ්ඩලය තීරණය කළ බව වෙළෙඳ අමාත්‍ය බන්දුල ගුණවර්ධන මහතා පැවසුවා.
කිරිපිටි කිලෝව රුපියල් 200 කින් ද, කිලෝ ග්‍රෑම් 12.5 ක ගෘහස්ථ ගෑස් සිලින්ඩරයක මිල රුපියල් 550 කින් ද, තිරිඟු පිටි කිලෝව රුපියල් දහයකින් සහ සිමෙන්ති කොට්ටයක මිල රු.50 කින් ද වැඩි කිරීමට අදාළ සමාගම් කර තිබු ඉල්ලීමට පාරිභෝගික අධිකාරියේ අනුමැතිය ලැබී තිබු පසුබිමක තවදුරටත් මෙම මිල ගණන් ඉහළ නොදැමීමට කැබිනට් මණ්ඩලය තීරණය කිරීම විශේෂත්වයක්.
ඩොලර් හිඟය සහ ලෝක වෙළද පොළේ මිල ගණන් ඉහළ යාම හේතුවෙන් කිරිපිටි, ගෑස්, තිරිගු පිටි සහ සිමෙන්තිවල මිල ගණන් වැඩි කරන ලෙස මීට පෙරද ආනයනකරුවන් පාරිභෝගික අධිකාරියෙන් අවස්ථා ගණනවකදි ඉල්ලීම් කර තිබුණා.
කෙසේ වෙතත් පසුගිය සමයේ අදාළ මිල ගණන් ඉහළ නොදැමීම තුළ මේ වනවිට වෙළෙදපොළේ දැඩි කිරිපිටි සහ සිමෙන්ති හිඟයක් නිර්මාණය වී තිබෙනවා.
