කොවිඩ් 19 රෝගීන් සඳහාම වෙන්කර තිබෙන හෝමාගම මූලික රෝහලේ මෘත ශරීරාගාරයේ දින ගණනාවක පටන් කොවිඩ් මළ සිරුරු 5ක් තැන්පත් කර තිබීම හේතුවෙන් දැඩි සෞඛ්‍යමය ගැටලුවක් ඇති වී ඇතැයි හෝමාගම මූලික රෝහලේ අධිකරණ වෛද්‍ය නිලධාරිනි වෛද්‍ය නදීරා දයාවංශ මහත්මිය පවසනවා.
එම මළසිරුරු මෙතෙක් භාර නොගෙන ඇති අතර ඔවුන් සියලු දෙනාම මුස්ලිම් ජාතික පිරිමි සහ ගැහැණු අය වනවා.
ඉන් මළසිරුරු හතරක් අධි ශීතකරණය තුළත් තවත් මළ සිරුරක් ඉන් පිටතත් තැන්පත් කර ඇතැයි අධිකරණ වෛද්‍ය නිලධාරිවරිය පවසනවා.
වෛරසය ආසාදිත මළ සිරුරු අධිශීතකරණය තුළ තැන්පත් කර තිබීමෙන් වෛරසය තවත් පැතිරීමට හේතුවක් වී ඇති බවටද ඇය සදහන් කළා.
කොවිඩ් 19 වෛරසයෙන් මියගිය පුද්ගලයකුගේ මළ සිරුරක් පැය 24 තුල ආදාහනය කිරීමට නියමිතව වුවද මුස්ලිම් ප්‍රජාව ආදාහනයට අකමැතිවීම හා ඒ සඳහා මුදල් ගෙවා පෙට්ටි ලබාදීමට අකමැත්ත පළ කිරීමත් හේතුවෙන් මෙම ගැටළුකාරී තත්ත්වය උද්ගතව තිබෙනවා.
එමෙන්ම ආදාහන කටයුතු රජයෙන් සිදු කිරීමට අවශ්‍ය මිනී පෙට්ටි මිලදී ගැනීම සඳහා ප්‍රතිපාදන නොවීමත් හේතුවෙන් මළ සිරුරු මෙයාකාරයෙන් දින ගණනාවක් තැන්පත්ව තිබීම සියලුම කාර්ය මණ්ඩල සාමාජිකයන්ට දැඩි සෞඛ්‍ය ගැටලුවක් බව අධිකරණ වෛද්‍යවරිය වැඩිදුරටත් පැවසුවා.
හෝමාගම මූලික රෝහලේ ජනරජ සෞඛ්‍ය සේවා සංගමයේ සභාපති ගයාන් චමින්ද මහතා පවසන්නේ මෙම තත්ත්වය කාර්ය මණ්ඩලයේ ජීවිතවලට පවා දැඩි බලපෑමක් එල්ල කරන බවයි.
දින ගනනාවක සිට ශීතකරණයෙන් පිට තිබෙන මළ සිරුර නරක් වීමෙන් දැඩි දුර්ගන්ධයක් පවා එම ස්ථානය පුරා පවතින බවත් මේ සම්බන්දයෙන් බලධාරීන් වහාම ක්‍රියාමාර්ගයක් ගතයුතු බවත් ඔහු සදහන් කළා.
