බීමත් සුරාබදු නිලධාරීන් කණ්ඩායමක් කොළඹ වන් ගෝල්ෆේස් වෙළඳ සංකීර්ණයේ පිහිටි පීසා ආපන ශාලාවක සේවකයෙකුට ඊයේ (06) රාත්රියේ පහර දී තිබෙනවා.
පොලීසිය කියා සිටියේ පහරකෑමෙන් තුවාල ලැබූ අදාළ ආපන ශාලාවේ ප්රධාන කෝකියා හා සුරාබදු නිලධාරියෙකු කොළඹ ජාතික රෝහලට ඇතුළත් කර ඇති බවයි.
කොළඹ වන් ගෝල්ෆේස් වෙළෙඳ සංකීර්ණයේ 6 වැනි මහලෙහි පිහිටි පීසා ආපන ශාලාවක මෙම ගැටුම සිදුව තිබුණා.
එහි සේවය අවසන් කර ඉන් පිටව යාම සඳහා එක් සේවකයෙකු තම හෙල්මටය අසළ වූ මේසයක් මත තබා ඇති බව සඳහන්.
ඒ අතරතුර පැමිණි සුරාබදු නිලධාරීන් කණ්ඩායමක් අදාළ හෙල්මටය රැගෙන යාමට උත්සාහ කර නැවත වතාවක් එම ස්ථානයේ තබා යන අයුරු අසළ තිබූ CCTV කැමරාවක සටහන්ව තිබුණා.
ඉන් පසුව ආපන ශාලාවේ කළමනාකාරවරයා සහ එහි ප්රධාන කෝකියා අදාළ නිලධාරීන් කණ්ඩායමක් සමඟ බහින් බස්වීමක් ඇතිවී තිබෙන බව වාර්තා වනවා.
ඒ අතරවාරයේ දී සුරාබදු නිලධාරීන් අවස්ථා කිහිපයකදී ප්රධාන කෝකියාට පහර දීමට උත්සාහ දරණ අයුරු CCTV කැමරාවක පටිගතව ඇති අතර එහිදී සුරාබදු නිලධාරීන් සමඟ ඇති වෙන පොර බැදීමේදී ඔවුන් අවස්ථා කිහිපයකදීම බිම වැටෙන අයුරුද එහි සටහන්ව තිබෙනවා.
අනතුරුව 15 දෙනෙකුගෙන් පමණ සමන්විත සුරාබදු නිලධාරීන් පිරිස එම ස්ථානයෙන් ගොස් නැවත පැමිණ එහි ප්රධාන කෝකියාට බිම දමාගෙන දරුණු ලෙස පහරදී ඇති බවයි වාර්තා වන්නේ.
පහරකෑමෙන් තුවාල ලැබූ ප්රධාන කෝකියා කොළඹ ජාතික රෝහලට ඇතුළත් කර තිබෙනවා.
සුරාබදු නිලධාරීන් දෙදෙනෙක් ද මේ වන විට කොළඹ ජාතික රෝහලේ ප්රතිකාර ලබමින් සිටිනවා.
පහරදීම සිදුකළ සුරාබදු නිලධාරීන් එම අවස්ථාවේදී අධික ලෙස බීමත්ව සිට ඇති බවයි පොලීසිය කියා සිටින්නේ.
