තුන්වන T 20 තරගයෙන් කඩුලු 10ක දැවන්ත ජයක් ලැබූ දකූණු අප්රිකාව ශ්රී ලංකාවට එරෙහිව 3-0ක් ලෙස පූර්ණ තරගාවලි ජයක් ලබන්නට සමත් වුණා.
ආර්. ප්රේමදාස පිටපියේ කාසිය වාසිය දිනූ දසුන් ශානක පළමුව පන්දුවට පහර දීම තෝරා ගත්තා.
නමුත් කිසිදු සැලසුමකින් තොරව පන්දුවට පහරදුන් ශ්රී ලංකා පිතිකරුවන්ගේ වගකීම් විරහිත පිතිරකරණය හේතුවෙන් නියමිත පන්දුවාර 20 තුළ ශ්රී ලංකා ඉනිම කඩුලු 8ක් දැවී ලකුණු 120 කට සීමා වුණා.
කුසල් ජනිත් ලකුණු 39ක් සහ චාමික කරුණාරත්න නොදැවී ලකුණු 24ක් ලබා ගත්තා.
කාගිසෝ රබාඩා සහ බියොන් ෆෝර්ටේන් කඩුලු 2 බැගින් දවා ගත්තා.
මේ අතර පන්දුවට පහරදීමෙන් අනතුරුව ස්වසන අපහසුතාවක් ඇතිවීම හේතුවෙන් කුසල් ජනිත් පන්දු රැකීම සඳහා පිටිය පැමිණියේ නැහැ. ඒ අනුව අතිරේක ක්රීඩකයෙක් ලෙස කණ්ඩායමට නම් කර සිටි දිනේෂ් චන්දිමාල් කඩුලු රැකීම සඳහා පිටියට පිවිසියා.
ශ්රී ලංකා පන්දු යවන්නන්ට සාර්ථක වීමට කිසිදු ඉඩක් ලබා නොදුන් රීසා හෙන්රික්ස් සහ ක්වින්ටන් ඩි කොක් දකුණු අප්රිකානු කණ්ඩායම ජයග්රහණය වෙත සුරැකිව රැගෙන ගියා.
පන්දුවාර 14.4 කදී දකුණු අප්රිකානුවන් කිසිවෙකු නොදැවී ජයග්රාහී ලකුණු 121 සම්පූර්ණ කරගත්තා.
සිය 7වන T20 අර්ධ ශතකය සම්පූර්ණ කළ හෙන්රික්ස් නොදැවී ලකුණු 56යි.
තරගයේ වීරයා වූ ඩි කොක් නොදැවී ලකුණු 59යි. මෙය ඔහුගේ 10වන T20 අර්ධ ශතකයයි.
ඒ අනුව 3-0ක් ලෙස පූර්ණ තරගාවලි ජයක් ලබන්නට සංචාරක දකුණු අප්රිකානු කණ්ඩායම සමත් වුණා.