මැතිවරණ කොමිෂන් සභාව සහ ප්රවෘත්ති වෙබ් අඩවි හිමිකරුවන්, සමාජ මාධ්ය ක්රියාකාරීන් පිරිසක් සමග අද (04) පෙරවරුවේ මැතිවරණ කොමිසමේදී සාකච්ඡාවක් පැවැත්වුණා.
මෙහිදී මැතිවරණ කොමිෂන් සභාවේ සාමාජිකයන් සමාජ මාධ්ය ක්රියාකාරීන්ගෙන් ඉල්ලා සිටියේ නිදහස් හා සාධාරණ මැතිවරණයක් පැවැත්වීමට අවශ්ය කෙරෙන පසුබිම සකසා ගැනීමට ඔවුන්ට හැකි සෑම සහයෝගයක්ම ලබාදෙන ලෙසයි.
මේ සඳහා සමාජ මාධ්යවලට මේ වන විට වැඩි වගකීමක් හිමිව තිබෙන බවත් සමාජ මාධ්ය හරහා ප්රචාරය වන දුස්තොරතුරු අවමකරගනිමින් සාධාරණ මැතිවරණයක් පැවැත්වීමට සහය දෙන ලෙසට මැතිවරණ කොමිෂන් සභාවේ අධ්යක්ෂ්ය ජනරාල් සමන් ශ්රී රත්නායක මහතා සදහන් කළා.
මෙහිදී මාධ්යවේදීන් ප්රශ්න කර සිටියේ මැතිවරණ නීති උල්ලංඝණය කරමින් සිදුකරන අනීතික රැස්වීම්, උත්සව, සාද වටලා ඒවා තහනම් කළද ඒ සම්බන්ධයෙන් කිසිදු නීතිමය ක්රියාමාර්ගයක් නොගන්නේ ඇයිද යන්නයි.
ඊට පිළිතුරු දෙමින් මැතිවරණ කොමිෂන් සභාවේ අධ්යක්ෂ්ය ජනරාල්වරයා සඳහන් කළේ ඒ සඳහා කිසිදු නෛතික හැකියාවක් මැතිවරණ කොමිසමට නොමැති බවයි.
මැතිවරණ පනත අනුව මෙවැනි වරදවල් සඳහා නීතිය ක්රියාත්මක කිරීමේ බලය පොලීසිය වෙත පැවරී ඇති බවත්, මැතිවරණ කොමිෂන් සභාවට කළ හැක්කේ අදාළ පුද්ගලයින් හා සිදුවීම් පිළිබදව පොලීසියට වාර්තා කිරීම පමණක් බවද සමන් ශ්රී රත්නායක මහතා වැඩිදුරටත් පෙන්වා දුන්නා.
එමෙන්ම ප්රධාන නාලිකා තුනක් දිගින් දිගටම මැතිවරණ නීති උල්ලංඝණය කරමින් අපේක්ෂකයින් ප්රවර්ධනය කරමින් සිටින බවට නිරීක්ෂණය වී ඇති බවත් ඔවුන් කොමිසමට කැඳවා මේ පිළිබදව කරුණු විමසන බවත් අධ්යක්ෂ්ය ජනරාල්වරයා සමාජ මාධ්ය ක්රියාකාරීන් අමතමින් සඳහන් කළා.
