හමුදා බුද්ධි අංශ නිලධාරීන් භාවිත කරන හැඳුනුම්පතට සමාන ව්යාජ හැඳුනුම්පතක් සන්තකයේ තබාගෙන භාවිත කළ බව කියන සැකකාර පුද්ගලයකු මෙම මස 20 දින දක්වා රක්ෂිත බන්ධනාගාරගත කරන ලෙස කොළඹ අතිරේක මහෙස්ත්රාත් පවිත්රා සංජීවනී පතිරාජ මහත්මිය අද (16) නියෝග කළා.
පෑලියගොඩ පොලිසිය මඟින් අත්අඩංගුවට ගෙන අධිකරණයට ඉදිරිපත් කළ විරාජ් මධුසංක නැමැත්තෙකු එලෙස රක්ෂිත බන්ධනාගාර ගත කිරීමට නියම කෙරුණා.
පෑලියගොඩ පොලිස් බල ප්රදේශය තුළ මාර්ග බාධකයක දී සැකකාර පුද්ගලයා පරීක්ෂාවට ලක් කිරීමේ දී ඔහු සතුව තිබී එම සැක සහිත හැඳුනුම්පත අත්අඩංගුවට ගත් බව ද පොලිසිය අධිකරණයට දැනුම් දුන්නා.
සැකකාර පුද්ගලයා අත්අඩංගුවට ගෙන සිදු කළ ප්රශ්න කිරීම්වල දී මේ වන විට හමුදාවේ සක්රීය සේවයේ යෙදී සිටින පුද්ගලයෙකු විසින් ඔහුට එම හැඳුනුම්පත සකස් කරදී ඇති බවට කරුණු අනාවරණය වූ බව ද පොලිසිය අධිකරණය දැක්වූ කරුණු වලින් හෙළි වුණා.
සිද්ධිය සම්බන්ධයෙන් කරුණු දක්වමින් පොලීසිය අධිකරණය හමුවේ කියා සිටියේ මෙම හැදුනුම්පත භාවිතා කරමින් සැකකාර පුද්ගලයා කිසියම් නීති විරෝධී ක්රියාවන් සිදුකර තිබේද නැද්ද යන්න පිළිබඳව තවදුරටත් විමර්ශනය සිදු කරන බවයි.
අදාළ හැඳුනුම්පත හමුදා අංශ වෙත යොමු කර එහි සත්ය අසත්යතාවය පිළිබඳව තහවුරු කිරීමට පියවර ගන්නා බව ද සිද්ධිය සම්බන්ධයෙන් කරුණු දක්වමින් පොලිසිය අධිකරණය හමුවේ වැඩිදුරටත් පැවසුවා.
