තායිලන්තයේ බැංකොක් අගනුවරට මදක් ඔබ්බෙන්, ප්‍රාථමික පාසල් ළමුන් රැගත් බස් රථයක් ගිනිගෙන ඇති බව විදෙස් මාධ්‍ය වාර්තා කරනවා.
ගින්නෙන් ළමුන් 20කට වැඩි පිරිසක් ජීවිතක්ෂයට පත්ව ඇති අතර තවත් පිරිසක් තුවාල ලබා ඇති බව සඳහන්.
අනතුර වන අවස්ථාවේදී බසය තුළ සිසුන් 38 දෙනෙකු සහ ගුරුවරුන් හය දෙනෙකු සිටි බවයි වාර්තා වන්නේ.
ගින්නෙන් බස් රථය සම්පූර්ණයෙන්ම විනාශ වී ඇති අතර අනතුර සිදුවන අවස්ථාවේ ළමුන් සහ ගුරුවරුන් කිහිපදෙනෙක් බස් රථයෙන් පැන යාමට සමත්ව ඇති බවත් සඳහන්.
අනතුරට ලක් වූ මෙම රථය එරට උතුරු ප්‍රදේශයේ උතයි තානි හි (Uthai Thani) සිට පාසල් ක්ෂේත්‍ර චාරිකාවකට ගොස් ආපසු එමින් සිටි ළමයින් සහ ගුරුවරුන් රැගත් බස් රථයක් වූ බවයි වැඩිදුරටත් සඳහන් වන්නේ.
ගින්නට හේතුව ලෙස විදෙස් වාර්තා පෙන්වා දෙන්නේ බස් රථයේ ඉදිරිපස ටයරයක් පුපුරා යාමෙන් රථය පාලනය කරගත නොහැකිව මාර්ගය කෙළවර තිබූ ලෝහ බාධකයක ගැටී මෙලෙස විනාශ වී ඇති බවයි.
