2024 ජනාධිපතිවරණයේ ඡන්ද ගණන් කොට ප්‍රතිඵල නිකුත් කිරීමේදී කිසිදු අකටයුත්තකට ඉඩ නොතබා එම කාර්යය ඉතාම නිවැරදිව හා නිරවුල් ලෙස සිදු කිරීමට මැතිවරණ කොමිසම හා ඊට අදාළ නිලධාරීන් කටයුතු කරනු ඇතැයි විශ්වාස කරන බව ජාතික ජනබලවේගය පවසනවා.
ජාතික ජනබලවේගයේ ජනාධිපති අපේක්ෂක අනුර කුමාර දිසානායක මහතාගේ නිල ෆේස්බුක් ගිණුම ඔස්සේ මාධ්‍ය නිවේදනයක් නිකුත් කරමින් ජාතික ජනබලවේගය අවධාරණය කර ඇත්තේ ඡන්ද ගණන් කිරීමේ මධ්‍යස්ථානවල ආරක්‍ෂාව තහවුරු කිරීමට පොලීසිය ඇතුළු ආරක්ෂක අංශ කටයුතු කරනු ඇති බව ඔවුන් විශ්වාස කරන බවයි.
මේ තත්වය තුළ රාත්‍රී ඇඳිරි නීතිය පැනවීම ඡන්ද ප්‍රතිඵල ප්‍රකාශ කරන අවස්ථාවේ මහජන සාමය පවත්වා ගැනීමේ අරමුණින් පමණක් සිදු කරන්නක්ය යන්න විශ්වාස කරන බවත්, පශ්චාත් මැතිවරණ කාලයේ රට තුළ උපරිම සාමකාමී තත්වයක් පවත්වාගෙන යාමට අවශ්‍ය පියවර ගන්නා මෙන් ආරක්ෂක අංශවලින් ඉල්ලා සිටින බවත් ජාතික් ජනබලවේගය තවදුරටත් පවසනවා.
මේ අතර තොරතුරු වාර්තා වන අන්දමට සාමකාමී මැතිවරණයක් පැවැත්වෙන මෙම අවස්ථාවේදී ඇඳිරි නීතිය ප්‍රකාශයට පත්කිරීම සම්බන්ධයෙන් මැතිවරණ කොමිසම විරෝධය පලකර ඇති පසුබිමක ජනාධිපතිවරයා මෙලෙස ඇඳිරි නීතිය ප්‍රකාශයට පත්කර තිබෙනවා.
