මුදල් විශුද්ධිකරණය වැළැක්වීම සහ ත්රස්තවාදයට මුදල් සැපයීම මැඬ පැවැත්වීම පිළිබඳ ආසියා ශාන්තිකර කණ්ඩායම විසින් පැවැත්වීමට නියමිත ශ්රී ලංකාවේ අන්යෝන්ය ඇගයීම සඳහා සූදානම් වීමේ වැදගත්කම පිළිබඳ සාකච්ඡාවක් ජනාධිපති අනුර කුමාර දිසානායක මහතාගේ ප්රධානත්වයෙන් පවත්වා තිබෙනවා.
ඒ ඊයේ (23) පස්වරුවේ ජනාධිපති කාර්යාලයේදී.
මෙම සාකච්ඡාව සඳහා අමාත්ය මණ්ඩලය, අමාත්යාංශ ලේකම්වරු, ශ්රී ලංකා මහ බැංකුවේ නිලධාරීන් සහ මුල්ය බුද්ධි ඒකකයේ නිලධාරීන් සහභාගි වි තිබුණා.
අමාත්යාංශ, නියාමන ආයතන, නීතිය ක්රියාත්මක කිරීමේ නියෝජිත ආයතන ඇතුළුව, පාර්ශ්වකාර ආයතන 24ක් සඳහා සම්පාදනය කර ඇති අමාත්ය මණ්ඩල අනුමැතියලත් ක්රියාකාරී සැලසුම් ක්රියාත්මක කිරීමේ කඩිනම් අවශ්යතාව මෙහිදී මූල්ය බුද්ධි ඒකකය විසින් අවධාරණය කර තිබෙන බවයි පැවසෙන්නේ.
මූල්ය ක්රියාකාරී කාර්ය සාධක බලකාය (FATF) විසින් සකස් කරන ලද නිර්දේශය ක්රියාත්මක කිරීම සඳහා නීතිමය ප්රතිසංස්කරණ, ධාරිතා ගොඩනැඟීම, වැඩිදියුණු කළ අන්තර් නියෝජිතායතන සහයෝගීතාව සහ විස්තීර්ණ සංඛ්යා ලේඛන පවත්වා ගෙන යාම සඳහා මෙම ක්රියාකාරී සැලසුම තුළ ප්රමුඛතාව ලබාදෙනවා.
මෙම සැලසුම් සමඟ පූර්ණ අනුකූලතාව සහතික කිරීම සඳහා කැපවූ කණ්ඩායම් පත් කරන ලෙසත් එහි ප්රගතිය සමීපව නිරීක්ෂණය කරන ලෙසත් ජනාධිපති අනුර කුමාර දිසානායක මහතා මූල්ය බුද්ධි ඒකකය, අමාත්යවරුන්, ලේකම්වරුන් හා නිලධාරීන්ට උපදෙස් දී තිබුණා.
එසේම මෙම කාර්ය පිළිබඳව සහයෝගයෙන් යුතුව කැපවන ලෙස ඉල්ලා සිටි ජනාධිපතිවරයා ශ්රී ලංකාවේ මූල්ය පද්ධති ස්ථාවරත්වය සුරක්ෂිත කරමින් සහ රටේ ආර්ථිකය පිළිබඳ ජාත්යන්තර විශ්වාසය රැක ගැනීමටත් ඒ හරහා හිතකර ඇගයීම් ප්රතිඵලයක් අත්කර ගැනීමටත් මුදල් විශුද්ධීකරණය වැළැක්වීමේ සහ ත්රස්තවාදයට මුදල් සැපයීම මැඬ පැවැත්වීමේ ශක්තිමත් සහ සඵලදායී රාමුවක් අත්යවශ්ය බව පෙන්වා දුන් බවයි පැවසෙන්නේ.
