සිය රටට බලපා ඇති දැඩි ගංවතුර තත්ත්වය හමුවේ එළවලු ඇතුළු අනෙකුත් ආහාර ද්‍රව්‍ය ඉන්දියාවෙන් මිලදී ගැනීමට බලාපොරොත්තු වන බව පාකිස්ථාන මුදල් අමාත්‍යවරයා පවසනවා.
ඒ ගංවතුර තත්ත්වය හමුවේ පාකිස්ථානයේ වගා භුමි විශාල ප්‍රමාණයක් විනාශවී ඇති පසුබිමක් තුලයි.
කාශ්මීරයේ පාලනය සම්බන්ධයෙන් ඇතිවූ ගැටලුකාරී තත්ත්වය හේතුවෙන් ඉන්දියාව සමග සියලු වෙළෙද ගනුදෙනු අත්හිටුවීමට පාකිස්ථානය මිට තෙවසරකට පෙර තීරණය කරනු ලැබුවා.
කෙසේ වුවද පාකිස්ථාන මුදල් අමාත්‍යවරයා නැවත ඉන්දියාව දෙසට මිත්‍රත්වයේ දෑත් දිගු කර සිටින්නේ එරට සම්පුර්ණ භුමි ප්‍රමාණයෙන් තුනෙන් එකක් ගංවතුරෙන් යටවී ඇති පසුබිමක් තුළයි.
මේ අතර ඉන්දීය අග්‍රාමාත්‍ය නරේන්ද්‍ර මෝදී ද පාකිස්ථානයේ ඇතිවී තිබෙන ගංවතුර තත්ත්වය සම්බන්ධයෙන් ට්විටර් සටහනක් තබා ඇත.
එහි දැක්වෙන්නේ පකිස්ථානයේ ගංවතුරෙන් සිදු වූ විනාශය දැකීමෙන් තමන් මහත් කණගාටුවට පත්වූ බවයි.
මෙම ස්වභාවික ව්‍යවසනයෙන් විපතට පත් වූවන්, තුවාල ලැබූවන් සහ විපතට පත් වූ සියලු දෙනාගේ පවුල්වලට අපගේ හෘදයාංගම ශෝකය ප්‍රකාශ කරන අතර ඉක්මනින් යථා තත්ත්වයට පත් වීමට හැකිවෙනු ඇතැයි බලාපොරොත්තු වන බව ද එහි සඳහන්.
ගංවතුර තත්ත්වයෙන් මේ වන පුද්ගලයින් 1,130 කට අධික පිරිසක් මියගොස් ඇති අතර විපතට පත්ව ඇති පිරිස මිලියන 03කට අධික බව වාර්තා වෙයි.
ගෝලීය වශයෙන් ඇතිවී තිබෙන කාලගුණික විපර්යාසය නිසා මෙවන් තත්ත්වයකට පාකිස්ථානයට මුහුණ දීමට සිදුව ඇති බව එරට රජයේ බලධාරීන් සඳහන් කළා.
