සුඛෝපභෝගී මෝටර් රථ හා අධිබල එන්ජින් ධාරිතාවය සහිත යතුරුපැදි යොදාගෙන කල්පිටියේ සිට අනුරාධපුරය දක්වා ඊයේ (17) දිනයේ වාහන සවාරියක් පවත්වා තිබෙනවා.
Spin Riders නම් සංවිධානයක් විසින් මෙය සංවිධානය කර තිබූ අතර ඊට රථ වාහන පොලීසියේ ආරක්ෂාවද ලබාදී තිබුණා.
කෙසේ වෙතත් මෙය ගමන්ගන්නා අතර තුර මාදම්පේ ඇතුළු ස්ථාන කිහිපයකදී ජනතා විරෝධය එල්ල වුණා.
රටේ දැවැන්ත ඉන්ධන අර්බුදයක් පවත්නා මෙවන් අවස්ථාවක පෙට්‍රල් හා ඩීසල් නාස්ති කරමින් මෙලෙස වාහන සවාරියක් ගමන් කිරීමේ අවශ්‍යතාවය කුමක්දැයි විරෝධතාවයේ නිරත ජනතාව සවාරියේ ගමන්ගන්නා රථවාහනවලින් විමසා සිටියා.
දළුව මංසන්ධියේදී කල්පිටිය ශාසනාරක්ෂක බලමණ්ඩලයේ ලේඛකාධිකාරී පූජ්‍ය මිගෙට්ටුවත්තේ සුමිත්ත හිමියන් මාර්ගය අවහිර කර අදාළ පිරිසට විරෝධය පලකළා.
කෙසේ වෙතත් මෙම රැළිය සංවිධානය කළ පිරිස පවසන්නේ තමන් එක්රැස් කරගත් රුපියල් ලක්ෂ 12 ක මුදලක් මහරගම අපේක්ෂා පිළිකා රෝහල වෙත ලබාදීම සඳහා මෙලෙස වාහන පෙළපාලියකින් ගමන් ගන්නා බවයි.
මෙය සෑම වසරකම පැවැත්වෙන බවත්, මින් කිසිදු පුද්ගලයෙකුට හිරිහැරයක් නොවන බවත් සංවිධායකයින් සදහන් කරනවා.
නමුත් මෙහි ගමන්ගත් යතුරුපැදියක් අනතුරට ලක්වන ආකාරයද සමාජ මාධ්‍යවල සංසරණය වනවා.
කෙසේ වෙතත් මහජන විරෝධය හා කොන්දේසි වලට පටහැනිවීම නිසා කල්පිටියේ සිට අනුරාධපුර දක්වා පැවැත්වීමට නියමිතව තිබූ මීරිගම සිට පැමිණි මෙම වාහන සවාරිය නතර කිරීමට පොලීසිය අද (18) පියවර ගෙන තිබුණා.
ඊට අදාළ දර්ශන පහතින්,
