රජයට විරුද්ධ ජනතා රැල්ලක් මතුවී තිබෙන බව යම් යම් හේතු කාරණා නිරික්ෂණයේදී පෙනී යන බව සෞඛ්‍ය අමාත්‍ය කෙහෙළිය රඹුක්වැල්ල මහතා පවසනවා.
ඒ, ජනාධිපති මාධ්‍ය ඒකකයේ අද (01) පැවැති විශේෂ මාධ්‍ය හමුවකට සහභාගීවෙමින්.
සාධාරණ විරෝධතාවලට කිසිදු ගැටලුවක් නැතත්, පොලු මුගුරු රැගෙන කරනු ලබන විරෝධතා සම්බන්ධයෙන් නිතිමය ක්‍රියාමාර්ග ගත යුතුව ඇති බවයි අමාත්‍යවරයා පවසන්නේ.
මෙම මාධ්‍ය හමුව සදහා ප්‍රවාහන අමාත්‍ය, දිලුම් අමුණුගම, සංචාරක අමාත්‍ය ප්‍රසන්න රණතුංග යන මහත්වරුද සහභාගී වී සිටියහ.
මේ අතර, මිරිහානේ පිහිටි ජනාධිපතිවරයාගේ පෞද්ගලික නිවස ආසන්නයේ ඊයේ පැවති විරෝධතාව සම්බන්ධයෙන් ජනාධිපති මාධ්‍ය අංශය අද පෙරවරුවේ නිවේදනයක් නිකුත් කරමින් සඳහන් කළේ විරෝධතාවයේ නිරත වූ පිරිස අතර සිටි සංවිධානාත්මක අන්තවාදීන් පිරිසක් කළහකාරී ලෙස හැසිරෙමින් ප්‍රචණ්ඩකාරී තත්ත්වයක් ඇති කළේ යැයි අනාවරණ වී ඇති බවයි.
ඔවුන් ”අරාබි වසන්තයක් මෙරට ඇති කරමු“ ලෙස හඬ නගමින් මෙම උද්ඝෝෂණය මෙහෙයවා ඇති බව ද එමඟින් නිකුත් කළ නිවේදනයේ වැඩිදුරටත් දැක්වෙනවා.
