ප්‍රධාන පක්ෂයක අත්පත්‍රිකාවක් භාර ගැනිම ප්‍රතික්ෂේප කළ වෙළෙඳසැලක සිටි පුද්ගලයෙක්ට එම අත්පත්‍රිකා බෙදමින් සිටි පුද්ගලයෙක් පහරදීමේ සිද්ධියක් නාවලපිටිය ප්‍රදේශයෙන් වාර්තා වනවා.
සමගි ජන බලවේගයේ නාවලපිටිය ආසන සංවිධායකවරයා විසින් එම පහරදීම සිදුකර ඇති බවයි වාර්තාවන්නේ.
මෙම පහරදිම සිදුකර ඇත්තේ ඊයේ (15) උදැසන 11ට පමණයි.
එම පුද්ගලයාට ආසන සංවිධායකවරයා විසින් පහරදෙන අයුරු වෙලඳසැලේ සවි කර තිබු ආරක්ෂිත කැමරාවේ සටහන්ව තිබෙනවා.
නාවලපිටිය නගර මධ්‍යයේ පිහිටි ඔරලෝසු අලුත්වැඩියා කරන ස්ථානයේ හිමිකරුගේ පුත්‍රයාට මෙලෙස පහර දී ඇති බවයි වාර්තාවන්නේ.
සජබ නාවලපිටිය ආසන සංවිධායකවරයා ආධාරකරුවන් පිරිසක් සමග එම වෙළෙඳසැල තුළට පැමිණ තරුණයාට අත්පත්‍රිකාවක් ලබාදී ඇති අතර එම අවස්ථාවේ අත්පත්‍රිකාව ලබා ගැනීම තරුණයා ප්‍රතික්ෂේප කර තිබෙනවා.
පහර කැමෙන් පසුව අදාළ තරුණයා නාවලපිටිය දිස්ත්‍රික් මහ රෝහලට ඇතුළු වී ප්‍රතිකාර ලබා එම රෝහලේ පොලීසිය වෙත ගොස් පැමිණිල්ලක් කර ඇති අතර අද (16) රෝහලෙන් පිටව ගොස් ඇති බව වැඩිදුරටත් වාර්තා වුණා.
