ඇමරිකා එක්සත් ජනපදය සහ ඉන්දියාව අතර පැවැත්වීමට නියමිත සිව්වෙනි අමාත්ය හමුවට සතියක පමණ කාලයක් තිබිය දී, රුසියාව සමඟ පවත්වා ගෙන යනු ලබන ආර්ථික සබඳතාවලට ඇමරිකානු සාකච්ඡා මගින් කිසිදු බලපෑමක් සිදු නොවන බවට ඉන්දියාව යළි සහතිකයක් ලබාදී තිබේ.
ඉන්දීය විදේශ කටයුතු අමාත්යාංශයේ සහ එක්සත් ජනපද රාජ්ය දෙපාර්තමේන්තුවේ නිල ප්රකාශයන්ට අනුව අප්රේල් 11 වන දින ඉන්දීය සහ එක්සත් ජනපදයේ අමාත්යවරුන් අතර සාකච්ඡා පැවැත්වීමට නියමිතයි.
ඉන්දීය විදේශ අමාත්යාංශයේ ප්රකාශකයකුට අනුව යුක්රේන තත්ත්වය සහ රුසියානු සම්බාධක සංවාද න්යාය පත්රයේ වැදගත්ම මාතෘකා වනු ඇති නමුත් රුසියාවෙන් තෙල් ආනයනය කිරීම ඇතුළුව ඉන්දියාව සහ රුසියාව අතර වේගයෙන් වැඩෙන වෙළඳාම කෙරෙහි බලපෑම් කිරීමට එක්සත් ජනපදයට අවශ්ය නොවනු ඇත.
මෙම සංවාදයට පෙර, එක්සත් ජනපද රාජ්ය ලේකම් ඇන්තනි බ්ලින්කන් ඉන්දීය විදේශ අමාත්ය එස් ජයශංකර් සමඟ යුක්රේනයේ තත්ත්වය ඇතුළු කලාපීය සහ ගෝලීය ප්රමුඛතා පිළිබඳ දුරකථන ඇමතුමක් ඔස්සේ සමාලෝචනය කර ඇතැයි ද මාධ්ය වාර්තා පවසයි.
රටවල් දෙක අතර හමුවේ දී ඉන්දීය දූත පිරිස ස්වදේශ කටයුතු අමාත්ය රාජ්නාත් සිං සහ විදේශ කටයුතු අමාත්ය ජයශංකර් විසින් මෙහෙයවනු ලබන අතර එක්සත් ජනපදය නියෝජිත පිරිස රාජ්ය ලේකම් ඇන්තනි බ්ලින්කන් සහ ආරක්ෂක ලේකම් ලොයිඩ් ඔස්ටින් විසින් මෙහෙයවනු ඇත.