ආශිර්වාද කළ ජලයෙන් කොවිඩ් තුරන් කිරීමට හැකි බවට පැවසූ ශ්රී ලාංකික යකැදුරා කොවිඩ් ආසාදිතව මියගොස් ඇති බවට අල් ජසීරා පුවත් සේවය වාර්තා කරනවා.
ඒලියන්ත වයිට් විසින් තම “ආශිර්වාද ලත්” ජල භාජන ගංගාවලට වත් කිරීම මගින් ලංකාවේ සහ අසල්වැසි ඉන්දියාවේ කොවිඩ් වසංගතය අවසන් කළ හැකි බව පසුගිය නොවැම්බර් මාසයේදී පැවසූ බවත්, එවකට සෞඛ්ය ඇමතිනී පවිත්රා වන්නිආරච්චි මහත්මිය මීට සහය දැක්වූ නමුත් මාස දෙකකට පසුව ඇයද කොවිඩ් ආසාදනය වී රෝහල් දැඩි සත්කාර ඒකකයට ඇතුළත් කළ බවත් අල් ජසීරා වාර්තා කරනවා.
ඉන්දීය ක්රිකට් ක්රීඩක සචින් තෙන්ඩුල්කාර්ගේ දණහිසේ ආබාධයකට ප්රතිකාර කිරීම ගැන තෙන්ඩුල්කාර් විසින් ඔහුට ප්රසිද්ධියේ ස්තූති කිරීමෙන් 2010 වසරේදී ඒලියන්ත වයිට් ජාත්යන්තර අවධානයට ලක්වූ බවත් ගෞතම් ගාම්භීර් සහ ආශිෂ් නෙහ්රා ඇතුළු අනෙකුත් ඉන්දීය ක්රිකට් ක්රීඩකයන්ටද ඔහු ප්රතිකාර කළ බව පැවසෙන බවත් එම පුවත් වාර්තාවේ සඳහන්.
එමෙන්ම, තමාට වයස අවුරුදු 12 සිට “විශේෂ බලයක්” ඇති බව ඒඑෆ්පී ප්රවෘත්ති ඒජන්සිය සමඟ 2010 පැවති සම්මුඛ සාකච්ඡාවකදී වයිට් කියා සිටි බවත් එබැවින් ඔහු COVID-19 එන්නත ප්රතික්ෂේප කළ බව ඔහුගේ පවුලේ ඥාතීන් පවසන බවත් එහි සඳහන්.
ඒලියන්ත වයිට් නැමති යකැදුරා තමන් විසින් වසර 3000 ක් පැරණි ඉන්දියානු වෛද්ය සම්ප්රදායේ ක්රම භාවිතා කළ බව පවසන නමුත් බටහිර වෛද්යවරුන් මෙන්ම ආයුර්වේද වෛද්යවරුන්ද ඔහුගේ ප්රකාශ ප්රතික්ෂේප කළ බවත් අවසානයේදී කොවිඩ් ආසාදිතව මියගිය ඔහුගේ සිරුර කොළඹදී ආදාහනය කළ බවත් එහි වැඩිදුරටත් සඳහන් වේ.