බොදුබල සේනා සංවිධානයේ මහලේකම් පූජ්‍ය ගලගොඩඅත්තේ ඥාණසාර හිමියන්ව ‘එක රටක් එක නීතියක්’ ජනාධිපති කාර්ය සාධක බලකායේ සභාපතිධූරයට පත්කිරීමට විරෝධය පළ කරමින් අධිකරණ අමාත්‍ය ජනාධිපති නීතිඥ අලි සබ්රි මහතා සිය අමාත්‍ය ධුරයෙන් ඉල්ලා අස්වන බවට මීට පෙර තොරතුරු වාර්තා වූණා.
ඒ අනුව සිය අමාත්‍ය ධුරයෙන් මෙන්ම පාර්ලිමේන්තු මන්ත්‍රී ධූරයෙන්ද තමන් ඉල්ලා අස්වන බව දන්වමින් ඊට අදාළ අස්වීමේ ලිපි දෙකක් අමාත්‍ය අලි සබ්රි මහතා විසින් ජනාධිපති ගෝඨාභය රාජපක්ෂ මහතාට ඊයේ (5) බාරදී තිබෙනවා.
කෙසේ වෙතත් මෙම ඉල්ලා අස්වීමේ ලිපි දෙක ජනාධිපතිවරයා භාර නොගත් බවට තොරතුරු වාර්තා වනවා.
ජනාධිපතිවරයා හමුවේ අධිකරණ අමාත්‍යවරයා සඳහන් කර ඇත්තේ නීති සකස් කිරීමට රටේ නිශ්චිත ක්‍රමවේදයක් පවතින අවස්ථාවක මෙවැනි කාර්යසාධක බලකා මාර්ගයෙන් නීති සකස් කිරීමට යෑම අනවශ්‍ය ගැටළු මතු වන්නක් බවයි.
එමෙන්ම බොදුබල සේනා සංවිධානයේ මහලේකම් පූජ්‍ය ගලගොඩඅත්තේ ඥාණසාර හිමියන්ව මෙම ජනාධිපති කාර්ය සාධක බලකායට පත්කිරීම සම්බන්ධයෙන් තමාගේ පැහැදීමක් නැති බවද අලි සබ්රි මහතා පවසා තිබෙනවා.
ඊට පිළිතුරු වශයෙන් ජනාධිපති ගෝඨාභය රාජපක්ෂ මහතා පවසා ඇත්තේ මෙම ජනාධිපති කාර්ය සාධක බලකාය පත්කළේ තමාට එම කාරණයට අදාළව උපදෙස් ගැනීමට පමණක් බවයි.
තවද නීති සකස් කිරීමේ කටයුතුවලදී අනිවාර්යෙන්ම අධිකරණ ඇමැතිවරයාගේ දායකත්වය ලබා ගන්නා බවද ජනාධිපතිවරයා අලි සබ්රි මහතාට දැනුම්ද තිබෙනවා.
