තමන්ට වැඩිය දේශපාලනය නොතේරෙන බවත් මේ මොහොතේ ඇත්තේ භාණ්ඩාගාරයේ හිස්කමක් බවත් ප්‍රවීණ රංගනවේදී ජයසේකර අපෝන්සු මහතා පවසනවා.
ඒ ඉරිදා ලංකාදීප පුවත්පත සමඟ පැවති සම්මුඛ සාකච්ඡාවකදීයි.
පසුගිය ජනාධිපතිවරණයේදී ඔහු ගෝඨාභය රාජපක්ෂ මහතාගේ ජයග්‍රහණය වෙනුවෙන් කැපවී ක්‍රියාකළා.
“දැන් මොකද වෙන්නේ කියලා හැමෝම ඇහුවා. ඇත්තටම ඒ්කත් අපිට ප්‍රශ්නයක් තමයි. හැම තැනම පෝලිම්. මාත් ටෙලි නාට්‍යයක රඟපාලා තමයි යාන්තන් දැන් ජීවිතේ ගෙනියන්නේ. මගේ ජීවිතේ ගත්තත් කොරෝනා වසංගතය නිසා මහා විශාල වෙනස්කම් සිද්ධ වුණා. කොරෝනා හින්දා හිතවතුන් පවා ඈත් වුණා. ආණ්ඩුවෙන් හොඳ දේවල් කරගෙන ආවා. නමුත් කොරෝනා වසංගතය නිසා ඩොලර් නැතිවීමත් නිසා ආණ්ඩුවට විශාල ප්‍රශ්න ආවා. මේක ආකල්පමය වෙනසක් නැතුව දේශපාලකයන් තම තමන්ම හදාගන්න ගිහිල්ලා තමයි මේ දේ වෙලා තියෙන්නේ.
හැබැයි ගෝඨාභය ජනාධිපතිතුමා යුද්ධය ලස්සනට ඉවර කළා වගේ රටේ සංවර්ධන යුද්ධයත් ඉවර කරන්න තමයි බලාපොරොත්තුවෙන් ආවේ. නමුත් අද ඒ සියල්ල වෙනස් වෙලා. ගෑස් නැව් ඇවිල්ලා මුහුදේ තියෙනවා. තෙල් නැව් ඇවිල්ලා තියෙනවා. ඒ්වා ගන්න සල්ලි නැහැ. මිනිස්සු හරියට දුර්වල වෙලා. මම දැන් දර ලිපේ උයනවා. මම කුප්පි ලාම්පුවටත් ඔට්ටු කෙනෙක්. මම දේශපාලනය ගැන වැඩිය දන්නේ නැහැ. උදව් කරන්න ගියාට මට තේරෙන්නෙ භාණ්ඩාගාරයේ හිස්කමක් තමයි එතන තියෙන්නේ. මිනිස්සු ඒක තේරුම් අරන් පොඩි උදව්වක් කරනවා නම් හොඳයි කියලා තමා මම හිතන්නේ.”
