හම්බන්තොට යෝජිත වන අලි කළමනාකරණ රක්ෂිතය ගැසට් කරන ලෙස ඉල්ලමින් සූරියවැව වල්සපුගල ප්‍රදේශයේ ගොවින් පිරිසක් සිදුකරන සත්‍යග්‍රහයට සහය පළකරමින් සමස්ත ලංකා ගොවිජන සම්මේලනය හා ගොවි සංවිධාන එක්ව පැවැත් වු විරෝධතාවය අධිකරණ නියෝගයක් මත විසුරුවා හැර තිබේ.
අම්බලන්තොට තවලුවිල ප්‍රදේශයෙන් පාගමනින් පැමිණි විරෝධතාතරුවන් හා සූරියවැව ඇතුළු ප්‍රදේශ කිහිපයක සිට රථ පෙළපාලියක් ඔස්සේ පැමිණි විරෝධතාකරුවන් පෙළපාලියකින් අම්බලන්තොට නගරමධ්‍යයේදී විරෝධතාවයේ යෙදුණි.
එම විරෝධතාවය සඳහා 1500 පමණ පිරිසක් මෙන්ම සමස්ත ලංකා ගොවිජන සම්මේලනයේ ජාතික සංවිධායක නාමල් කරුණාරත්න, පාහියන්ගල ආනන්ද සාගර හිමි ඇතුළු ජාතික භික්ෂු සංවිධාන නියෝජනය කරමින් භික්ෂුන් වහන්සේලා රැසක් මෙන්ම ගොවි නායකයින් එක්ව සිටින ලදි.
විරෝධතාවය හේතුවෙන් කොළඹ – කතරගම මාර්ගය අම්බලන්තොට නගරයෙන් හරස්වීම හේතුවෙන් පැය එකහමාරක පමණ කාලයක් දැඩි වාහන තදබදයක්ද පැවතුනි.
ඒ අනුව පොලිසිය විසින් අධිකරණ නියෝගයක් ගෙන අදාළ විරෝධතාවයේ නියැලී සිටි පිරිස් විසුරවා හැරීමට කටයුතු කර තිබේ.
මේ අතර හම්බන්තොට යෝජිත වන අලි කළමනාකරණ රක්ෂිතය ගැසට් කරන ලෙස ඉල්ලමින් සූරියවැව වල්සපුගල ප්‍රදේශයේ ගොවින් පිරිසක් විසින් ආරම්භ කළ සත්‍යග්‍රහයට අදට දින 53ක් ගත ව තිබේ.
