අධිවේගී මාර්ග ඔස්සේ රෝගීන් ප්‍රවාහනය කරන ගිලන් රථ ගාස්තුවලින් නිදහස් කිරීමට ප්‍රවාහන අමාත්‍යාංශය තීරණය කර තිබෙනවා.
ඒ අනුව මැයි මස 20 වනදා සිට අදාල තීන්දුව ක්‍රියාත්මක වනු ඇති.
කෙසේ වෙතත් අදාළ තීන්දුව සම්බන්ධයෙන් තම මැදිහත්වීම දැක්වෙන ආකාරයේ ප්‍රචාරයක් ගුදම් පහසුකම්, බහාලුම් අංගන, වරාය සැපයුම් පහසුකම් හා බෝට්ටු හා නැව් කර්මාන්ත සංවර්ධන රාජ්‍ය අමාත්‍ය ජයන්ත සමරවීර මහතා සමාජ මාධ්‍ය ඔස්සේ සිදුකරමින් පවතිනවා.
ඔහු සඳහන් කරන්නේ ඉත්තෑපාන රෝහලේ ගිලන් රථ රියදුරෙකු විසින් තම සම්බන්ධීකරණ ලේකම්වරයෙකුට සිදුකරන ලද දැනුවත්කිරීම මත තමාගේ මැදිහත්වීමෙන් අදාළ පාර්ශව දැනුවත් කල බවයි.
ඒ අනුව මෙම තීරණය ගත් බව ඔහුගේ නිල ෆේස්බුක් පිටුවේ සදහන් කර තිබෙනවා.
ඒ අනුව අධිවේගී මාර්ගයේ ඡායාරූපයක්, ගිලන් රථයක් හා ජයන්ත සමරවීර මහතා සිනහ මුසු මුහුණින් සිටිනා ඡායාරූපයක් එක්කොට සාදාගන්නා ලද පෝස්ටරයක් මාර්ගයෙන් ” රෝගීන් ගෙන යන ගිලන් රථ ගාස්තුවලින් නිදහස් කරන ලදී” ලෙස ප්‍රචාරය කර තිබෙනවා.
ඔහුගේ මෙම පෝස්ටරය මගින් අධිවේගී මාර්ගවල ගිලන් රථවලින් ගාස්තු අයකරගන්නා බවක් නොදැන සිටි බොහෝ දෙනෙක් දැනුවත්වූ ආකාරයක් දක්නට ලැබෙනවා.
ඊට ප්‍රතිචාර දක්වන්නන් සදහන් කර තිබුණේ අත්‍යාවශ්‍ය මෙන්ම අතිශය සංවේදී සේවාවක් වන ගිලන් රථ සේවාවෙන්ද ගාස්තු අයකිරීමට මෙතෙක් ආණ්ඩුව කටයුතු කළේ ඇයිද යන්නයි.
