විදුලිය උත්පාදනය හා ස්වභාවික ද්රව වායු හෙවත් LNG සැපයීමට අදාළව රජය ඇමරිකානු සමාගමක් සමග ගිවිසුමක් අත්සන් කර ඇතැයි, ජනතා විමුක්ති පෙරමුණේ නායක අනුර කුමාර දිසානායක මහතා පෙරේදා (19) දින අනාවරණය කර සිටියා.
කෙරවළපිටියේ දැනට ක්රියාත්මක වන මෙගවොට් 350 ක යුගදනවි විදුලි බලාගාරය හිමි වෙස්ට්කෝස්ට් සමාගමේ කොටස්වලින් මහාභාණ්ඩාගාරයට අයත් 40% ක් ඇමරිකාවේ නිව් පෝට්ට්රෙස් නමැති සමාගමට විකිණීම සඳහා මුදල් අමාත්ය බැසිල් රාජපක්ෂ මහතා විසින් සිදු කළ යෝජනාවට කැබිනට් අනුමැතිය ලබා දෙන විට කැබිනට් මණ්ඩලය එම යෝජනාව කිසිඳු ඇමතිවරයෙක් දැක හෝ නොතිබූ බවයි අනුර කුමාර දිසානායක මහතා පෙන්වා දෙන්නේ.
ඇමරිකානු පුරවැසියෙකු වන බැසිල් රාජපක්ෂ අමාත්යවරයා නිසි ටෙන්ඩර් පටිපාටියෙන් පිට මෙම ගණුදෙනුව ඇමරිකානු සමාගමකට පවරා ඇති බවත් ඔහු අවධාරණය කර සිටිනවා.
“අනුමත කරලා කියනවා. මෙහෙම ‘කොටස් විකිණීමේ හා මිලදී ගැනීමේ ගිවිසුම අත්සන් කිරීමෙන් පසු එය අනුමත කිරීම සඳහා අමාත්ය මණ්ඩලය වෙත ඉදිරිපත් කරනු ඇත’. අත්සන් කරාට පස්සේ මොකක්ද අනුමත කරන්න කියන්නේ. අත්සන් කරලා ඉවරයි. ” යැයි ඒ මහතා පවසයි.
17 වෙනිදා රෑ 12 පසුවි විනාඩි 06 ට මීට අදාල ගිවිසුම් අත්සන් කළ බවත් අත්සන් කිරීමට පැමිණි ඇමරිකානු ජාතිකයා පසුවදා පාන්දර 2ට ඇමරිකාව බලා පිටත්ව ගිය බවත් ජනාධිපතිවරයාද පසුව ඇමරිකාව බලා පිටත්ව ගිය බවත් ඔහු පෙන්වා දෙනවා.
” ඔබ හිතනවාද මේ රටේ රෑ 12 .6ට ගිවිසුම් අත්සන් කරන්න. බකමුණො ද මේ ගොල්ලෝ. නිසාචරයින්ද? දැන් මොකද වෙන්නේ බලශක්ති ක්ෂෙත්රයේ අයිතිකාරයා තමයි හෙට අපේ රටේ ආණ්ඩු තීරණය කරන්නේ” යැයි ඔහු පවසයි.’
මෙය වළක්වා ගැනීමට අවශ්ය නීතිමය ක්රියාමාර්ගවලට යාමට අපෙක්ෂා කරන බවත් කොවිඩ් තත්වය භාවිතා කරගෙන විරෝධතා වළක්වා ලමින් රජය මෙවැනි ගිවිසුම් වලට එළැඹෙමින් සිටින බවත් ජනතා විමුක්ති පෙරමුණේ නායක අනුර කුමාර දිසානායක මහතා වැඩිදුරටත් පවසනවා.