එක්සත් ජනපදය සමඟ ඉහළ යන ආතතීන් මධ්‍යයේ, ඉරානය සහ චීනය ඔවුන්ගේ යුධ සබඳතා ක්‍රියාශීලීව ඉහළ නංවා ගැනිමින් ඇතැයි වාර්තා වේ.
ඒ අනුව ඉරාන ජනාධිපති ඊබ්‍රාහිම් රයිසි ඇතුළු ජ්‍යෙෂ්ඨ ඉරාන නිලධාරීන් සමඟ සාකච්ඡා පැවැත්වීම සඳහා චීන ආරක්ෂක අමාත්‍ය වෙයි ෆෙංගේ ටෙහෙරානයේ සංචාරයක ද නිරත විය.
චීන ආරක්ෂක අමාත්‍යවරයා සමඟ පැවති රැස්වීමේදී ඉරානය ඒකාබද්ධ යුධ අභ්‍යාස, උපාය මාර්ග හුවමාරු කර ගැනීම සහ පුහුණුව සඳහා ද්විපාර්ශ්වික සහයෝගීතාව පුළුල් කිරීමට එකඟ වූ බව ඉරානයේ සන්නද්ධ හමුදා මාණ්ඩලික ප්‍රධානී මේජර් ජෙනරාල් මොහොමඩ් බගෙරි පැවසීය.
වඩා හොඳ ආරක්ෂාවක් සැපයීමට හැකි වන පරිදි දෙරටේ සන්නද්ධ හමුදාවන් අතර පුහුණු ගැටළු සහ අනෙකුත් පොදු ක්ෂේත්‍ර පුළුල් කිරීමටද එහිදී එකඟ වූ බව බගෙරි සදහන් කළේය.
මේ අතර ,චීනය සහ ඉරානය අතර උපායමාර්ගික ආරක්ෂක සහයෝගීතාව වැඩිදියුණු කිරීම සංචාරයේ අරමුණ බව චීන ආරක්ෂක අමාත්‍ය වෙයි පැවසීය.
එක්සත් ජනපදය සමඟ නොසන්සුන්කාරී තත්ත්වය මධ්‍යයේ චීනය සහ ඉරානය මෑත වසරවලදී ඔවුන්ගේ යුධ සබඳතා වැඩි දියුණු කර ඇති අතර ජනවාරි මාසයේදී, දෙරට සහ රුසියාව සමඟ ඉන්දියානු සාගරයේ ඒකාබද්ධ නාවික අභ්‍යාස ද පවත්වනු ලැබිණ.
පසුගිය වසරේ චීනය සහ ඉරානය ආර්ථික හා දේශපාලන සබඳතා ශක්තිමත් කර ගැනීමේ අරමුණින් වසර 25ක සහයෝගීතා ගිවිසුමකටද අත්සන් තැබීය.
