වැලිගමදී සිදුවූ පොලිස් ප්‍රහාරය සම්බන්ධයෙන් මේ වන විට විමර්ශනයක් අරඹා ඇති බව සම කැබිනට් මාධ්‍ය ප්‍රකාශක, අමාත්‍ය වෛද්‍ය රමේෂ් පතිරණ මහතා පවසනවා.
ඒ, අද (07) පැවැති කැබිනට් තීරණ දැනුම්දීමේ මාධ්‍ය හමුවේදීයි.
අදාල සිද්ධිය සම්බන්ධයෙන් අපක්ෂපාතී පරීක්ෂණයක් ආරම්භ කිරීමට අමාත්‍ය සරත් වීරසේකර මහතා කටයුතු කර ඇති බවත් ඊට අදාලව සාධාරණයක් ඉටුවනු ඇති බවත් රමේෂ් පතිරණ මහතා පවසනවා.
මාතර, වැලිගම, ගල්බොක්ක ප්‍රදේශයේ මේ මස 01දා පැවැති කොවිඩ් මර්දන එන්නත් ලබාදීමේ වැඩසටහනට ප්‍රදේශවාසීන් විශාල පිරිසක් පැමිණ තිබූ අතර ඒ වන විටත් ලැබී තිබූ එන්නත් මාත්‍රා ප්‍රමාණය අවසන් වී තිබුණා.
නමුත් දිගින් දිගටම ජනතාව එහි රැඳී සිටීම හේතුවෙන් එම ස්ථානයට පැමිණි වැලිගම පොලිසියේ පොලිස් ස්ථානාධිපතිවරයා ඇතුළු පොලිස් නිලධාරීන් ගම් වාසීන් එම ස්ථානයෙන් ඉවත් කළේ බැටන් පහරද ලබා දෙමින්.
බැටන් ප්‍රහාර එල්ල කරමින් ජනතාවට හිරහැර කිරීමේ චෝදනාව මත මාතර – වැලිගම මූලස්ථාන පොලිස් පරීක්ෂකවරයාට වහාම ක්‍රියාත්මක වන පරිදි ස්ථාන මාරුවක් ද ලද අතර ඔහුව ගාල්ල නියෝජ්‍ය පොලිස්පති කාර්යාලයට අනුයුක්ත කර තිබෙනවා.
