ලාභදායී චීන වෙළඳපොළට පිවිසීමට අපේක්ෂා කරන ශ්‍රී ලංකා අපනයනකරුවන් සඳහා මාර්ගගත වේදිකාවක් හදුන්වා දීමට බීජිං හි ශ්‍රී ලංකා තානාපති කාර්යාලය පියවර ගෙන තිබේ.
සීමාසහිත හයිරොං ටෙක්නොලොජි සමාගමේ ද සහය ඇතිව එහි මූලික ආරම්භයක් ලෙස ආයෝජන ප්‍රවර්ධන සම්මන්ත්‍රණයක් ඉකුත් 11 වනදා පැවැත්වූ අතර ශ්‍රී ලංකාවේ පවතින ආයෝජන අවස්ථාවන් ගවේෂණය කිරීම සඳහා මෙම වේදිකාව මඟින් අනාගත ආයෝජකයින් දිරිමත් කිරීම අපේක්ෂා කෙරේ.
තානාපති ආචාර්ය පාලිත කොහොන සහ සීමාසහිත හයිරොං ටෙක්නොලොජි හි සාමාන්‍යාධිකාරී ජෝන් පෑන් මහතා විසින් මෙම වේදිකාව නිල වශයෙන් දියත් කරන ලදි. චීනයේ රාජ්‍ය හිමිකාර ව්‍යාපාරවල සභාපතිවරුන් සහ පෞද්ගලික සමාගම්වල ප්‍රධාන විධායක නිලධාරීන්ද මීට සහභාගී විය.
ආයෝජන සඳහා පළමු තේරීම ලෙස ශ්‍රී ලංකාව පිළිබඳව සලකා බලන ලෙස තානාපති ආචාර්ය පාලිත කොහොන මහතා මෙහිදී අනාගත ආයෝජකයින්ගෙන් ඉල්ලා සිටින ලදි.
ශ්‍රී ලංකාවේ සංචාරක කටයුතු, කෘෂිකාර්මික හා පුනර්ජනනීය බලශක්ති යන අංශවල විශාල ආයෝජන අවස්ථා පවතින බව මෙහිදී අදහස් දක්වමින් හයිරොන්ග් ටෙක් හි සාමාන්‍යාධිකාරී ලියෝ පෑන් මහතා පවසන ලදි.
ඛනිජ වැලි ක්ෂේත්‍රයේ හා කාබනික පොහොර නිෂ්පාදන ක්ෂේත්‍රයේ ආයෝජනය කිරීමෙ සඳහා පවතින හැකියාව පිළිබඳව චීන මෙටලර්ජිකල් සමූහය ගවේෂණය කරමින් සිටින බව චීන මෙටලර්ජිකල් සමූහයේ (MCC) උප සභාපති ෂු ෂියැංචුන් මහතා පවසන ලදි.
එමෙන්ම, සුළං බලශක්තිය සහ සූර්ය විදුලිබල උත්පාදනය සඳහා ආයෝජනය කිරීමට උනන්දුවක් දක්වන බව හුආඩියන් සමූහයේ වැන්ග් මියාවෝයුවෑන් මහතා පැවසීය.
