නිදහස් මාධ්‍යවේදියෙකු මෙන්ම අන්තර් විශ්ව විද්‍යාල ශිෂ්‍යසංගමයේ ක්‍රියාකාරික, රුහුණු මහා ශිෂ්‍ය සංගමයේ හිටපු සභාපති ඇන්තනි වෙරංග පුෂ්පික අද (27) පස්වරුවේ පොලිසිය විසින් රැගෙන ගොස් තිබෙනවා.
කොළඹ කොටුවේ පැවති උද්ඝෝෂණයකින් පසුව ගුරු මැදුර වෙත යාම සඳහා බස් රියකට ගොඩවැදී සිටියදී 6 ගෙන් සමන්විත සිවිල් පිරිසක් විසින් ඔහුව රැගෙන ගොස් නිල් පැහැ ජීප් රියක දමාගත් බවයි පැවසෙන්නේ.
ඔහු අනිද්දා පුවත්පතේ කතෘ මණ්ඩල සාමාජිකයෙකු ලෙසත් සේවය කර තිබෙනවා.
මේ අතර ඊයේ (26) සවස් කාලයේදී කටුනායක ගුවන් යානයකදී අත්අඩංගුවට ගත් පුද්ගලයා චෝදනා රාශියකට සැකකරුවෙකු වශයෙන් හඳුනාගෙන ඇති බව පොලිසිය පවසනවා. ඔහු අපරාධ පරීක්ෂණ දෙපාර්තමේන්තු නිලධාරීන් භාරයේ පසුවන බවයි පොලිස් මාධ්‍ය කොට්ඨාසය නිකුත් කළ නිවේදනයේ දැක්වෙන්නේ.
