ඉන්දියාවේ ඊසානදිග ත්‍රිපුර ප්රාන්තයේ මුස්ලිම් පල්ලිවලට සහ මුස්ලිම්වරුන්ට අයත් දේපළවලට එල්ල වූ ප්‍රහාරවලින් පසු නොසන්සුන්තාවක් හටගෙන ඇතැයි වාර්තා වෙනවා.
විපතට පත් ප්‍රදේශවල ආරක්ෂාව තර කර ඇති අතර රැස්වීම්වලට සීමා පැනවීමට ද කටයුතු කර තිබෙනවා.
ප්‍රචණ්ඩකාරී වාතාවරණය හටගෙන ඇත්තේ හින්දු කණ්ඩායම් සහ පොලිසිය අතර ඇති වූ ගැටුමකින් පසුවයි.
අසල්වැසි බංග්ලාදේශයේ හින්දු භක්තිකයින්ට එල්ල වූ ප්‍රහාරවලට එරෙහිව විරෝධතා රැළියක් පැවැත්වීමට පොලීසිය අවසර නොදීමට එරෙහිව මෙම කණ්ඩායම් විරෝධතාවයේ නිරත වී තිබෙනවා.
වාර්ෂික හින්දු ආගමික උත්සවයක් වන දුර්ගා පූජා සඳහා පිහිටුවා ඇති විශේෂ මණ්ඩපයකදී අල් කුරානයට අපහාස කර ඇති බවට කටකතා පැතිරීමෙන් මේ මස මුලදී බංග්ලාදේශයේ අවම වශයෙන් පුද්ගලයින් හත් දෙනෙකු ඝාතනය කර හින්දු සුළුතරයේ නිවාස,කෝවිල් සහ ව්‍යාපාර සිය ගණනක් ගිනිබත් කිරීමට කටයුතු කර තිබුණා.
ත්‍රිපුර ප්‍රාන්තය පැති තුනකින් බංගලාදේශයෙන් වට වී ඇති අතර අසල්වැසි ඇසෑම් ප්‍රාන්තයට තුනී කොරිඩෝවකින් සම්බන්ධ වී තිබෙනවා.
එම ප්‍රාන්තය වසර 25ක කොමියුනිස්ට් පාලනයෙන් පසු 2018 සිට ඉන්දියාවේ පාලක භාරතීය ජනතා පක්ෂය (BJP) විසින් ප්‍රාන්තය පාලනය කරනු ලබනවා.
