අනුරාධපුර ප්‍රධාන දුම්රිය ස්ථානයේ රාජකරියේ නිරතව සිටින දුම්රිය නියාමකවරු පිරිසක් අද (18) පෙරවරුවේ සිට ආරම්භ කරන ලද වැඩ වර්ජනය පස්වරුවේදි අවසන් වුණා.
දුම්රිය නියාමකවරුන් එලෙස වර්ජනයක නිරත වුණේ, අනුරාධපුර ප්‍රධාන දුම්රිය ස්ථානයේ රථ ගාලේ නවතා තිබු දුම්රිය නියාම වරයෙකුට අයත් යතුරු පැදියක් මත තිබු හිස්වැසුමක් කිසිවෙකු විසින් සොරා ගෙන යාමේ සිද්ධියකට විරෝධය දක්වමින්.
ප්‍රධාන දුම්රිය නියාමක පි.කේ.පි.පිරිස් මහතාට අයත් යතුරු පැදිය දුම්රිය ස්ථානයේ රථ ගාලේ නවතා තිබියදි යතුරු පැදිය මත තිබු හිස්වැසුම කිසිවෙකු විසින් ඊයේ රාත්‍රියේ සොරා ගෙන ගොස් තිබුණා.
දුම්රිය ස්ථානයේ පිහිටි රථ ගාලේ නිසි ආරක්ෂාවක් නොමැති නිසා වෙනත් ආරක්ෂිත ස්ථානයක රථ ගාලක් ඉදිකර දෙන ලෙස ඉල්ලමින් දුම්රිය නියාමකවරුන් පහළොස් දෙනෙකු සේවයෙන් ඉවත් වී වර්ජනයක නිරත වුණා.
මේ හේතුවෙන් අද පෙරවරැවේදි අනුරාධපුර සිට කිලිනොච්චිය දක්වා ධාවනය විමට නියමිතව තිබු දුම්රියත් අනුරාධපුරේ සිට මැදවච්චියටත් මැදවච්චියේ සිට අනුරාධපුරයටත් ධාවනය විමට තිබු රේල් බස් දෙකත් ධාවනය නොවු බව අනුරාධපුර දුම්රිය අධිකාරි කේ.සි.ආර්.නවරත්න මහතා පැවසුවා.
මේ සම්බන්ධයෙන් දුම්රිය දෙපාර්තමේන්තුවේ සාමාන්‍යාධිකාරිවරයා හා දුම්රිය නියාමකවරැන්ගේ වෘත්තිය සමිති නියෝජිතයන් අතර අද කොළඹ පැවැති සාකච්ජාවේදි අනුරාධපුර ප්‍රධාන දුම්රිය ස්ථානයේ රථගාලට දුම්රිය දෙපර්තමෙන්තුවේ ආරක්ෂක නිලධාරිවරයෙකු යෙදවිමට පාලන අධිකාරිය විසින් එකග විම නිසා මෙම වර්ජනය අවසන් වුණා.
මෙම වර්ජනය හේතුවෙන් මගීන් විශාල පිරිසක් දැඩි දුෂ්කර තත්වයකට පත්වුණා.
