ශ්‍රී ලංකා පොදුජන පෙරමුණේ පාර්ලිමේන්තු මන්ත්‍රී අරුන්දික ප්‍රනාන්දු මහතා ශ්‍රී ලංකන් ගුවන් සමාගමේ ගුවන් නියමුවෙකු ලෙස සේවය කර නොමැති බව ශ්‍රී ලංකා ගුවන් සේවා ගුවන් නියමුවන්ගේ සංසදය පවසනවා.
නිවේදනයක් නිකුත් කරමින් එම සංසදය පවසන්නේ ශ්‍රී ලංකන් ගුවන් සමාගමේ සේවය කරන ගුවන් නියමුවන්ගේ එකම නියෝජිතයා වශයෙන් තම සංසදයට, ඔහු ගුවන් නියමුවෙක් ලෙස සිටි බවට තහවුරු කෙරෙන කිසිදු තොරතුරක් හමු නොවූ බවයි.
පසුගියදා පාර්ලිමේන්තුව අමතමින් පාර්ලිමේන්තු මන්ත්‍රී අරුන්දික ප්‍රනාන්දු මහතා සඳහන් කළේ පසුගිය මැයි 09 වනදා ඇතිවූ කළහකාරී සිදුවීම් අතරතුර තම නිවසටද ගිනි තබා විනාශ කර ඇති බවයි.
එහිදී දේශපාලනයට පැමිණීමට පෙර තම රැකියාව වූ ගුවන් නියමු රැකියාවට අදාළ පියාසර වාර්තා පවා ගිනිබත් වී ඇති බව දුක්මුසුව පවසා සිටියා.
