ආර්ථික මධ්‍යස්ථාන විවෘතව තබන ලෙස රජය විසින් සිදු කළ දැනුම්දීම අනුව රාත්‍රී කාලයේ ක්‍රියාත්මක වන මීගොඩ ආර්ථික මධ්‍යස්ථානය ඊයේ (14) දිනයේත් විවෘත කර තිබුණා.
කෙසේ වෙතත් එළවළු මිලදී ගැනීමට ජනතාව නොපැමිණීම හේතුවෙන් ආර්ථික මධ්‍යස්ථානයට ගෙනවිත් තිබූ රුපියල් ලක්ෂ 12ක පමණ එළවළු තොග නොමිලේ බෙදාදීමට වෙළෙදුන් කටයුතු කළා.
මීගොඩ ආර්ථීක මධ්‍යස්ථානයේ නොමිලේ එළවළු බෙදාදෙන බවට ලද තොරතුරු මත සංචරණ සීමාවන්ද නොතකමින් දහසකට ආසන්න පිරිසක් දිගු පෝලිම්වල සිට එළවළු රැගෙන යෑමට එම ස්ථානයට පැමිණ තිබුණා.
මීගොඩ ආර්ථික මධ්‍යස්ථානයේ වෙළෙඳ සංගමයේ ලේකම් චමින්ද රොහාන් මහතා පවසන්නේ මෙම තත්ත්වය තුළ රජය ආර්ථික මධ්‍යස්ථාන විවෘතව තැබුවද ලබන සඳුදා (17) දින තෙක් යළි එළවළු තොග නොගෙනීමටත් වෙළෙඳසැල් වසාදැමීමටත් තීරණය කළ බවයි.
