ශ්‍රී ලංකා පොදු ජන පෙරමුණේ සහය ලබා ගැනීම සම්බන්ධයෙන් හිටපු ජනාධිපති මහින්ද රාජපක්ෂ මහතා සමඟ තවත් එක්වරක් සාකච්ඡා කරන ලෙස නියෝජ්‍ය කාතානයක අජිත් රාජපක්ෂ මහතා ජනාධිපති රනිල් වික්‍රමසිංහ මහතාගෙන් ඉල්ලා තිබෙනවා.
ජනාධිපති තුමාගේ ප්‍රදානත්වයෙන් ජනාධිපති ලේකම් කාර්යාලයේ ඊයේ (30) පැවති මන්ත්‍රී කණ්ඩායම් රැස්වීමට එක්වෙමින් නියෝජ්‍ය කතානායකවරයා මෙම ඉල්ලීම සිදු කළේ.
මෙම ඉල්ලීම තමාගේ පෞද්ගලික ඉල්ලීමක් බවත් ජනාධිපති තුමා සහ අගමැති තුමා එක්ව හෝ නැත්නම් විශේෂ කමිටුවක් මගින් හෝ අවසන් වරට තවත් එක්වතාවක් මහින්ද රාජපක්ෂ මහතා හමුවී මේ පිළිබද සාකච්ඡා කරන ලෙසද නියෝජ්‍ය කතානායකවරයා මෙම හමුවේදී ජනාධිපතිවරයාගෙන් ඉල්ලීමක් කර ඇති බවයි වාර්තා වෙන්නේ.
“මේක ඉතාම සංවේදී අවස්ථාවක්. හදවතට දැනෙන් ප්‍රශ්නයක්. නමුත් අපි හොද බුද්ධියකින් මේ අවස්ථාවේ දී කටයුතු කළ යුතුයි. අපි අවුරුදු ගණනාවක් වැඩකළේ මහින්ද රාජපක්ෂ මැතිතුමාගේ නායකත්වය යටතේ. එතුමාගේ උපදෙස් වලට අනුව. ඒක හින්දා තවත් වතාවක් ශ්‍රී ලංකා පොදුජන පෙරමුණේ සහාය ලබා ගැනීම සම්බන්ධයෙන් හැකි නම් සාකච්ඡා කරන්න. කොහොම වුණත් ඉදිරි ජනාධිපතිවරණයෙන් රනිල් වික්‍රමසිංහ ජනාධිපතිතුමා ජයග්‍රහණය කරනවා. ඒක අතිවිශිෂ්ට ජයග්‍රහණයක් කරගන්න අපි කටයුතු කරමු.”
මෙම යෝජනාව නිවැරදි බවත් ඒ අනුව තවත් අවස්ථාවක් මහින්ද රාජපක්ෂ මහතා සමග මේ ගැන සාකච්ඡා කිරීමට බලාපොරොත්තු වන බවත් ජනාධිපති රනිල් වික්‍රමසිංහ මහතා මෙහිදි පවසා ඇති බවද වාර්තා වෙනවා.
