දකුණු ඉන්දියාවේ තමිල්නාඩු ප්‍රාන්තයේ අධික වර්ෂාවත් සමඟ ඇති වූ දරුණු ගංවතුර තත්ත්වයක් හේතුවෙන් අවම වශයෙන් පුද්ගලයින් 5 දෙනෙකු මියගොස් ඇතැයි වාර්තා වෙනවා.
ප්‍රාන්තයේ අගනුවර වන චෙන්නායි නගරයට දැඩි බලපෑම් එල්ල වී ඇති අතර නිලධාරීන් විසින් සිය ගණනක් ජනයා ඔවුන්ගේ නිවෙස්වලින් ඉවත් කිරීමට කටයුතු කර තිබෙනවා.
2015 වසරෙන් පසු නගරයට ඇදහැලෙන වැඩිම වර්ෂාපතනය මෙයයි.
බලධාරීන් පවසා ඇත්තේ ඉදිරි දින දෙක තුළ තවත් වර්ෂාපතනයක් අපේක්ෂා කරන අතර පහත් බිම්වල තවදුරටත් ගංවතුර ඇති විය හැකි බවයි.
වසරේ මෙම කාලය තුළ චෙන්නායි නගරයට අධික වර්ෂාපතනයක් ඇති වුවද, පාලනය නොකළ සංවර්ධනය සහ අයහපත් නාගරික සැලසුම් මෙම විනාශයට සහ අවුල් සහගත තත්ත්වයට හේතු වී ඇතැයි විශේෂඥයන් පවසා තිබෙනවා.
