මේ වන විට අවස්ථා කිහිපයකදී කොවිඩ් වසංගත තත්ත්වය සම්බන්ධයෙන් පිහිටවූ තාක්ෂණික හා උපදේශක කමිටුවලින් විශේෂඥ වෛද්යවරුන් සිව් දෙනෙකු ඉල්ලා අස්වී තිබෙනවා.
ඒ අනුව මහාචාර්ය නීලිකා මලවිගේ, මහාචාර්ය ඒ. පත්මේශ්වරන්, විශේෂඥ වෛද්ය ආනන්ද විජේවික්රම, විශේෂඥ වෛද්ය අසෝක ගුණරත්න යන ක්ෂේත්රයේ ප්රවීනයන් විවිධ හේතු මත එම කමිටුවලින් ඉල්ලා අස්වී තිබීම විශේෂත්වයක්.
පසුගිය ජූනි මාසයේදී උතුරු කොළඹ වෛද්ය පීඨයට අනුයුක්ත ප්රජා වෛද්ය විශේෂඥ මහාචාර්ය ඒ.පත්මේෂ්වරන් මහතා ජාතික ඖෂධ නියාමන අධිකාරියේ එන්නත් පිළිබඳ විශේෂඥ උපදෙස් කමිටුවෙන් ඉල්ලා අස්වුණා.
එමෙන්ම එම මාසයේදීම මහාචාර්ය නීලිකා මලවිගේ මහත්මියද එම කමිටුවෙන් ඉල්ලා අස්වීමට කටයුතු කළා.
මේ අතර ජාතික බෝවන රෝග විද්යායතනයේ කායික රෝග විශේෂඥ වෛද්ය ආනන්ද විජේවික්රම මහතා කොවිඩ් රෝග මර්දනය පිළිබඳ සායනික කමිටුවේ සාමාජිකත්වයෙන් පසුගියදා ඉල්ලා අස්වුණා.
එමෙන්ම විශේෂඥ වෛද්ය අශෝක ගුණරත්න මහතාද ඊයේ (07) දිනයේ එම කමිටුවෙන් ඉල්ලා අස්වී තිබෙනවා.
සිය ඉල්ලා අස්වීමේ ලිපිය විද්යුත් තැපෑලෙන් යොමුකරමින් විශේෂඥ වෛද්ය ආනන්ද විජේවික්රම මහතා සදහන් කර තිබුණේ වෛද්ය විශේෂඥයින්ගේ නිර්දේශ නොතකා ඇතැම් පාර්ශව එන්නත්කරණ ක්රියාවලිය පවත්වාගෙන යන බවයි.
මහනුවරට ස්පුට්නික්-වී එන්නතේ එක් මාත්රාවක් පමණක් ලබා දීම සහ හම්බන්තොට දිස්ත්රික්කයේ වයස අවුරුදු 20 සිට 29 දක්වා වයස් කාණ්ඩ වල පුද්ගලයින්ට ෆයිසර් එන්නත් ලබා දීම වැනි තීරණ වෛද්ය විශේෂඥයින්ගේ නිර්දේශයන්ට පිටින් සහ කමිටුවේ අනුදැනුමකින් තොරව සිදුකරන ලද ඒවා බව අදාළ ලිපියෙන් ආනන්ද විජේවික්රම මහතා පෙන්වාදී තිබෙනවා.