සංචාරක බටහිර ඉන්දීය කොදෙව් කණ්ඩායම සහ ශ්රී ලංකා කණ්ඩායම අතර පැවැත්වෙන පළමු ටෙස්ට් තරගයේ දෙවන දිනය අදයි.
අද දෙවන දිනය සඳහා තරගය නතර කරන විට බටහිර ඉන්දීය කොදෙව් කණ්ඩායම කඩුලූ 6 ක් දැවී ලකුණු 113ක් රැස් කර තිබුණා.
ඊයේ දිනය නිමා වන විට පන්දුවට පහර දෙමින් සිටි ශ්රී ලංකා කණ්ඩායමේ පළමු ඉනීම අද ලකුණු 386කට සීමාවුණා.
එහිදී ශ්රී ලංකා කණ්ඩායම වෙනුවෙන් ඊයේ සිය ටෙස්ට් දිවියේ 13 වන ශතකය සම්පූර්ණ කළ නායක දිමුත් කරුණාරත්න ලකුණු 147කට දැවීගියේ කොදෙව් දඟ පන්දු යවන ක්රීඩක රොස්ටන් චේස් එවූ පන්දුවකට කඩුලු රකින්නාගේ ස්ටම්ප් කිරීමකට හසුවීමෙනුයි.
එමෙන්ම ක්රීකට් පිටීයේ දුලබ දැවී යාමක් වන හිට් විකට් අවස්ථාවකට මුහුණ දී ධනංජය ද සිල්වා දැවීයන විට ඔහු රැස්කර තිබු ලකුණු සංඛ්යාව 61ක්.
එමෙන්ම දිනේෂ් චන්දිමාල්ද ස්ථාවර ඉනිමක් ගොඩනගමින් පන්දු 83කදී ලකුණු 45ක් ලබාගැනීමට සමත් වුණා.
ඒ අනුව ශ්රී ලංකා කණ්ඩායම සිය පළමු ඉනිම සඳහා සියලු ක්රීඩකයින් දැවී ලබාගත් ලකුණු සංඛ්යාව 386ක්.
අනතුරුව සිය පළමු ඉනිම ඇරඹි කොදෙව් පිතිකරුවන්ට පිටිය තුළ ස්ථාවර වීමට ශ්රී ලංකා යොවුන් දඟ පන්දු බලඇණිය ඉඩ ලබා දුන්නේ නැහැ.
ඉනිම ඇරඹුමේම කොදෙව් කඩුලු දඩයම ඇරඹූ රමේෂ් මෙන්ඩිස් දෙවන දිනය නිම වනවිට පන්දු වාර 6ක් යොමුකර ලකුණු 23කට කඩුලු 3ක් දවා ගැනීමට සමත්ව තිබුණා.
ඔහුට අගනා සහයක් දුන් ප්රවීන් ජයවික්රමද ලකුණු 25කට කඩුලු 2ක් දවාගත්තා.
පළමු දිනය නිමා වනවිට ලසිත් ඇඹුල්දෙණිය හිමිකරගෙන තිබුණේ එක් කඩුල්ලක් පමණයි.
එය ඔහුගේ ටෙස්ට් ක්රිකට් දිවියේ 50 වන කඩුල්ලයි.
පන්දුවට පහරදුන් කොදෙව් පිතිකරුවන්ගෙන් යම් සාර්ථකත්වයක් පෙන්වූ ක්රේග් බ්රේත්වේට් ලකුණු 41ක් ලබා සිටියදී රමේෂ් මෙන්ඩිස්ගේ පන්දුවකට පැතුම් නිස්සංක අතට උඩපන්දුවක් ලබාදෙමින් දැවී ගියා.
ඒ වන විට ඔහුගේ ඉනිමට හතරේ පහර 7ක් ඇතුළත්ව තිබුණා.
දෙවන දිනය සඳහා තරගය නතර කරන විට බටහිර ඉන්දීය කොදෙව්වන් වෙනුවෙන් කේ.මයර්ස් ලකුණු 22ක් ලබාගෙන සහ ජේසන් හෝල්ඩර් 01 ලකුණක් ලබාගෙන පිටියේ රැදී සිටියා.
ඒ වන විට කොදෙව්වන් කඩුලු 06ක් දැවී රැස්කරගෙන තිබු ලකුණු සංඛ්යාව 113ක්.
හෙට තරඟයේ තෙවන දිනයයි.