යේමනයේ හූතී කැරළිකරුවන් විසින් සෞදි අරාබියේ ජෙඩා සහ රියාද්හි තෙල් පර්යන්ත 2කට රොකට් සහ ඩ්‍රෝන ප්‍රහාර එල්ල කර ඇතැයි විදෙස් මාධ්‍ය සඳහන් කරනවා.
සෞදියේ ඉන්ධන පිරිපහදුවලට මෙන්ම සෞදි අරාබියේ රියාද් අගනුවර පිහිටි වැදගත් ස්ථාන ඉලක්ක කර ගනිමින් ද ප්‍රහාරය එල්ල වූ බවයි හූතී මාධ්‍ය ප්‍රකාශක සරියා පවසන්නේ.
හූතීන් යනු ෂීආවරුන්ගේ දර්ශනය හා සැලසුම් පැතිරවීම උදෙසා යෙමන් රාජ්‍යයට එරෙහිව සන්නද්ධ කැරැල්ලක් ඇරඹූ පිරිසකි.
2004 වසරේ සැප්තැම්බර් මස යේමන් රාජ්‍යයේ නිල හමුදාව විසින් එම ව්‍යාපාරයේ නිර්මාතෘ හා අධ්‍යාත්මික නායක “හුසෙයින් බද්රුද්දීන් අල් හූතී” ඝාතනය කරනු ලැබීය. වර්තමානයේදී ඔහුගේ බාල සොයුරු “අබ්දුල් මාලික් අල්හූති”ගේ නායකත්වය යටතේ ක්‍රියාත්මක වන මෙම සංවිධානය 2014 – 2015 ගෙන ගිය කැරැල්ලේ ප්‍රතිපලයක් වශයෙන් යෙමන් රාජ්‍යය බලය බිඳ වැටුණි. ඉන්පසු යේමන් අග නුවර සන්ආ ඇතුළු ප්‍රධාන නගර ඔවුන්ගේ පාලනයට නතුවිය.
“අන්සාරුල්ලාහ්” නැතහොත් “අෂ්ෂබාබුල් මුමින්” යන නමින්ද මෙම සංවිධානය හඳුන්වනු ලබයි. යෙමනයේ බලය නතු කරගෙන සිටින මොවුන් අසල්වැසි රටවල් වන සෞදි අරාබියාව, කටාර්, බහරේන්, එක්සත් එමිර් රාජ්‍යය වැනි රාජ්‍යයන්හි අභ්‍යයන්තර ආරක්ෂාවට හා ස්වෙයිරි භාවයට බලවත් තර්ජනයක් වී ඇත. ඔවුන්ට ඉරාන් රාජ්‍යය හරහා අවි ආයුධ හා යුද පුහුණු නොමදව ලැබෙන බවටද චෝදනා එල්ලවෙමින් පවතියි.
