ධාරානිපාත වර්ෂාව හේතුවෙන් ගොවීන් කලින් භාවිත කළ කාබනික පොහොර සියල්ල සේදී ගිය දිස්ත්‍රික්කවල ගොවීන්ට නිකුත් කිරීම සඳහා තවමත් රට තුළ ඇති රසායනික පොහොර තොග ලබාදීමට කෘෂිකර්ම අමාත්‍යාංශය පියවර ගෙන තිබෙනවා.
පසුගිය දිනවල ඇදහැලුණු ධාරානිපාත වර්ෂාවෙන් නුවරඑළිය, බදුල්ල සහ බණ්ඩාරවෙල දිස්ත්‍රික්කවල එළවළු සහ පළතුරු වගාකරුවන් භාවිත කළ කාබනික පොහොර සේදී ගොස් ඇති බව කෘෂිකර්ම අමාත්‍යාංශයේ ආරංචි මාර්ග පවසනවා.
මෙම දිස්ත්‍රික්කවල වී වගාවට සිදුවී ඇති හානිය පිළිබඳව බලධාරීන් මෙතෙක් තක්සේරු කර නොමැත.
විශේෂයෙන්ම එළවළු ගොවීන්ගේ තත්ත්වය බරපතළ බව කෘෂිකර්ම ඇමැති මහින්දානන්ද අලුත්ගමගේ මහතා පවසනවා.
අමාත්‍යවරයා සදහන් කරන්නේ කෘෂිකර්ම අමාත්‍යාංශය හදිසි පියවර නොගතහොත් එළවළු මිල සීඝ්‍ර ලෙස ඉහළ යාමක් අපට දැකගත හැකි බවයි.
ඒ අනුව කෘෂිකර්ම අධ්‍යක්ෂ ජනරාල්වරයා සමඟ සිදුකල සාකච්ඡාවකින් අනතුරුව මීට කඩිනම් පියවරක් ලෙස පොහොර ආනයනකරුවන්ගේ ගබඩාවල ඇති දිලීර නාශක සහ රසායනික පොහොර තොග පිළිබඳ ලැයිස්තුවක් සකස් කර ඒවා බලපෑමට ලක් වූ දිස්ත්‍රික්ක වෙත යැවීමට කටයුතු කරන ලෙස පළිබෝධනාශක රෙජිස්ට්‍රාර්වරයාට උපදෙස් දීමට තීරණය කර තිබෙනවා.
වී ගොවීන්ගේ වගා හානි වී ඇත්නම් ඔවුන්ට වන්දි ගෙවන ලෙස කෘෂි රක්‍ෂණ මණ්ඩලයට තමන් දැනුම් දුන් බවද අමාත්‍යවරයා පවසනවා.
