පන්නිපිටිය මංසන්ධියේදී ලොරි රථ රියදුරෙකුට අමානුෂික අන්දමින් පහරදුන් සිදුවීම සම්බන්දයෙන් රක්ෂිත බන්ධනාගාරගත කර සිටි මහරගම පොලිසියේ රථවාහන අංශයේ එන්. රිෆයිඩීන් නැමැති කොස්තාපල්වරයා රුපියල් ලක්ෂ 5 ක ශරීර ඇපයක් මත මුදාහරින ලෙස නුගේගොඩ මහේස්ත්‍රාත් ප්‍රසන්න අල්විස් මහතා ඊයේ (05) නියෝග කළා.
බන්ධනාගාර ගත කර සිටි සැකකාර පොලිස් කොස්තාපල්වරයා ඊයේ අධිකරණයට ඉදිරිපත් කර නොතිබූ අතර පැමිණිල්ල මෙහෙයවූ මහරගම පොලිස් රථවාහන අංශයේ සැරයන් වික්‍රමතුංග මහතා අධිකරණය හමුවේ කරුණු දැක්වමින් කියා සිටියේ මෙම සිද්ධි සම්බන්දයෙන් තවදුරටත් විමර්ශන සිදුකෙරෙමින් පවතින බවයි.
එම නිසා විමර්ශනවලින් අනතුරුව සැකකරුට එරෙහිව අධිකරණය හමුවේ චෝදනා පත්‍රයක් ගොනු කිරීමට අවශ්‍ය පියවර ගන්නා බවද ඔහු අධිකරණය ඉදිරියේ පවසා සිටියා.
තවද සැකකරු සම්බන්දයෙන් මානසික තත්ත්වය පිළිබඳ වෛද්‍ය වාර්තාවක් ඉදිරිපත් කරන ලෙස පෙර නඩු වාරයේදී අධිකරණය බන්ධනාගාරයට නියම කළද එම වාර්තාව මෙතෙක් ලැබී නොමැති බවද පැවසූ සැරයන් වික්‍රමතුංග මහතා ඉදිරි නඩු වාරයේදී එම වාර්තාව ඉදිරිපත් කිරීමට අවශ්‍ය පියවර ගන්නා බවද සදහන් කළා.
